Qyrǵyz-tájik shekarasynda qarýly qaqtyǵys bolyp, 5 adam jaraqattandy

BІShKEK-NUR-SULTAN. QazAqparat –Búgin qyrǵyz-tájik memlekettik shekara ýchaskesinde qarýly qaqtyǵys boldy. Bul týraly QazAqparat «Kabar» agenttigine silteme jasap habarlaıdy.

Qyrǵyz Respýblıkasy memlekettik shekara qyzmetiniń qoǵammen jáne BAQ-pen baılanys jónindegi bóliminiń habarlaýynsha, oqıǵa keshki jergilikti ýaqytpen saǵat 17.20-da bolǵan.

«Búgin, saǵat 17:20-da Qyrǵyzstan men Tájikstan azamattary arasynda qaqtyǵys boldy. Janjalǵa Vorýh (Tájikstan Respýblıkasy) aýylyndaǵy turǵyndardyń eldi mekenniń kire berisine flagshtok ornatýy sebep boldy. Aqsaı (Qyrǵyz Respýblıkasy) aýylynyń turǵyndary bul áreketke qarsy shyǵyp, eki jaq áýeli sózge kelip, keıin qarý qoldanylǵan. Oqty azamattyq tulǵa ańshy myltyǵynan atqan», - delingen habarlamada.

Aldyn ala málimetter boıynsha, atystan 5 adam jaraqat alǵan. Qazir Isfara-Vorýh jol jabyq tur.

«Bul aýmaqta negizinen Qyrǵyz Respýblıkasynyń shekara bólimsheleri ornalasqan. Eki eldiń shekarashylary qaqtyǵystyń qaıtalanyp, ýshyqpaýy úshin birlesken is-sharalar ótkizýde. Oqıǵa ornynda sondaı-aq, eki eldiń quqyq qorǵaý organdary men jergilikti bılik ókilderi de jumys júrigizip jatyr», - delingen agenttiktiń aqparatynda.