Qyrǵyz-tájik shekarasynda qarýly qaqtyǵys boldy
BІShKEK. KABAR-QazAqparat - Búgin, 8 mamyr kúni qyrǵyz-tájik memlekettik shekarasynda oq atyldy. Bul jaıynda Qyrǵyz Respýblıkasynyń Memlekettik shekara qyzmeti qoǵammen jáne BAQ-pen baılanys bóliminen málim etti, dep habarlaıdy QazAqparat Kabar agenttigine silteme jasap.
Tosyn oqıǵa Chek Batken oblysynda Qyrǵyzstan men Tájikstannyń shekaralas aýdandary turǵyndary arasynda 50 sotyq Chek ýchaskesin paıdalaný máselesine qatysty týyndaǵan. Atalǵan ýchaske eki memlekettiń de qaramaǵyna kiretindigi naqty belgilenbegen. Biraq, osy ýaqytqa deıin ony qyrǵyz tarapy paıdalanyp kelgen. Oqys oqıǵa barysynda Qyrǵyz tarapynan 30-40 adam jáne Tájikstan tarapynan 30-40 adam bir-birine tas ata bastap, sońynda ańshy myltyǵynan oq atylǵan. Janjaldyń ýshyǵyp ketýine jol bermeý úshin Qyrǵyzstannyń jáne Tájikstannyń shekara kezekshiligi áýege birneshe márte eskertý oǵyn atýǵa májbúr boldy.
Qyrǵyz Respýblıkasynyń Memlekettik shekara qyzmeti málimetinshe, oqys jaıt birqatar ýaqytqa tynyshtalǵan. Eki respýblıkanyń shekaralas aýmaqtarynyń turǵyndar arasynda túsindirý jumystary júrgizilgen.
«Alaıda, Tájikstannyń Ulttyq qaýipsizdik melekettik komıteti Shekara áskeriniń shekarashylary qyrǵyz shekarashylaryna jáne Qyrǵyzstan azamattaryna qarata mınometpen tosynnan oq jaýdyrdy», - delingen taratylǵan aqparatta.
Qazirgi ýaqytta qyrǵyz-tájik shekarasyndaǵy ahýal óte kúrdeli.
Tájikstannyń «Hovar» ulttyq aqparat agenttigi de qyrǵyz elimen shekarada oryn alǵan qaqtyǵysqa qatysty resmı aqparat taratty. Agenttik málimetine qaraǵanda, normatıvtik quqyqtyq aktilerge sáıkes Tájikstan Respýblıkasynyń aımaǵynda jatqan 4 gektar jerdi zańsyz ıemdenip alǵan Qyrǵyzstan azamattary janjalǵa sebep bolǵan.
«Qyrǵyz Respýblıkasynyń shekarashylary janjaldyń aldyn alýdyń ornyna ony arandatyp, Tájikstannyń qarýsyz azamattaryna qarata oq atty. Sonyń saldarynan Tájikstan Respýblıkasynyń 1983 jyly dúnıege kelgen azamaty Fazlıddın Fozılov pen 1971 jyly dúnıege kelgen Aıemıddın Sharıpov aýyr oq jaraqatyn aldy. Taraptardyń qabyldaǵan sharalarynyń nátıjesinde janjaldyń odan ary ýshýǵyna jol berilgen joq. Taraptardyń - Tájikstan Respýblıkasy men Qyrǵyz Respýblıkasy shekarashylarynyń, sonymen qatar eki taraptyń da memlekettik bılik organdarynyń arasynda jaǵdaıdy tolyqtaı turaqtandyrý úshin kelissóz júrgizilip jatyr», - dep atap ótedi agenttikten.
