Qyrǵyz-tájik shekarasynda atys bolyp jatyr - BAQ

BІShKEK. Kabar – QazAqparat – Qyrǵyzstannyń Batken oblysy Leılek aýdanynyń Jany-Jer aýylynda jergilikti turǵyndar atylǵan oqtyń astynda qalǵan, dep habarlaıdy QazAqparat Kabar aqparattyq agenttigine silteme jasap.

Qyrǵyz tarapynyń tujyrymy boıynsha, qaqtyǵys tolyq toqtamaǵan.

«Rasymen de, shekara mańy aýyldarynda atys bolyp jatyr. Shekaradaǵy jaǵdaı kúrdeli bolyp qalýda», - dep jazdy agenttik.

Eske sala ketsek, 28 sáýir kúni Qyrǵyzstan men Tájikstan shekarasynda eki el turǵyndary ózara kelispeı, qaqtyǵys bastaldy. Qyrǵyzstannyń Batken oblysynyń Batken aýdanynyń «Golovnoı» eldi mekeninde jaǵdaı shıelenisip ketti. Qyrǵyz tarapy qaqtyǵys aımaǵynan 848 adam kóshirilgenin málim etti.

Qyrǵyzstan men Tájikstan 29 sáýirde saǵat 20:00-den bastap atysty toqtatý týraly kelisimge keldi.

Sondaı-aq, Qazaqstan Prezıdenti qyrǵyz-tájik memlekettik shekarasyndaǵy jaǵdaıǵa baılanysty málimdememe jasady.