Qyrǵyz-tájik shekarasynda atys boldy
Qyrǵyzstandyq Kabar agenttiginiń málimetine sensek, 8 shilde kúni 17.00 kezinde memlekettik shekarada Qyrǵyzstan men Tájikstan shekara qyzmetiniń áskerıleri arasynda atys bolǵan.
«Qyrǵyz shekara jasaǵy Batken oblysy Láılek aýdany Naýmına asýyndaǵy memlekettik shekarada qyzmetin atqaryp júrgen. Tıisti baǵytpen kele jatqanda, Chashmagıldan asýynda olarǵa aıaq astynan tájik shekarashylary shabýyl jasaǵan. Eki eldiń áskerıleri arasynda atys bolǵan» delingen QR shekara qyzmeti taratqan habarlamada.
Oqıǵadan zardap shekkender týraly aqparat naqtylanyp jatyr.
Jaǵdaıdyń jaı-japsaryn anyqtaý úshin oqıǵa ornyna QR memlekettik ulttyq qaýipsizdik komıteti shekara qyzmetiniń Batken oblysy boıynsha basqarma bastyǵy, polkovnık Kyıalbek Tolonbaev, kúsh qurylymdarynyń basshylary attanǵan.
Eki eldiń shekara qyzmetiniń ókilderi atalǵan fakti boıynsha tekserý júrgizip jatyr.
Búgin sondaı-aq tájikstandyq Hovar agenttigi eldiń shekara qyzmetiniń osy jaǵdaıǵa qatysty taratqan habarlamasyn jarııalady.
Oǵan sensek, 8 shilde kúni jergilikti ýaqytpen saǵat 14.55 kezinde 4 qyrǵyz shekarashysy Soǵdy oblysy Devashtıch aýdany Rosrovýt degen jerde tájik shekarasyn zańsyz kesip ótken.
Olar áskerı jáne kádimgi kıim kıgen. Qoldarynda Kalashnıkov avtomaty bolǵan. Olar Devashtıch aýdany turǵyndaryna tıesili 9 jylqyny Qyrǵyzstan aýmaǵyna alyp ketý úshin kelgen.
Olar tájik shekarashylarynyń memlekettik shekarany kesip ótpeý týraly eskertpesine qulaq aspaı, avtomattan oq jaýdyrǵan. Buǵan tájik shekarashylary da oq atyp, jaýap bergen. Odan shekarany zańsyz kesip ótkenderdiń ekeýi jaraqat aldy.
«Qazirgi tańda qos memlekettiń quzyrly organ ókilderi oqıǵa ornyna kelip, qaqtyǵystyń mán-jaıyn anyqtap jatyr» dep jazady Hovar.
