Qyrǵyz-tájik kıkiljińinen qandaı sabaq alýymyz kerek – depýtat pikiri

NUR-SULTAN. QazAqparat – QR Parlamenti Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi Andreı Lınnık Tájikstan men Qyrǵyzstan shekarasyndaǵy jaǵdaıǵa qatysty pikir bildirdi, dep habarlaıdy QazAqparat tilshisi.

«Jańalyqtardan belgili bolǵandaı, janjal sheshilgen, degenmen qyrǵyz jáne tájik tarapynan zardap shekkender bar, qaza tapqandar da bar. Bul bizdiń shekaramyzǵa jaqyn mańda oryn aldy jáne taǵy alańdatqan nárse – UQShU elderiniń aımaǵynda bolǵany. Tájirıbe kórsetkendeı, biz de qańtar aıynda osyndaı oqıǵalarǵa tap boldyq. Bul taǵy da Prezıdent Qasym-Jomart Toqaevtyń qorǵanysymyzdy, qarýly tujyrymdamamyzdy noý-haý turǵysynan qaıta qaraý boıynsha zor kóńil bólý qajettigi týraly is-qımyldarynyń durystyǵyn kórsetti. Biz ozyq tehnologııalardy qoldanyp, qorǵanys-ónerkásip keshenine muqııat mán berip, kásiporyndarymyzǵa tapsyrys berýge tıispiz. Bizdiń elimizde áskerı qaıyqtar men teńizge arnalǵan basqa da tehnıkany óndire alatyn kásiporyndar bar ekenin bilemiz. Almaty oblysynda áskerı maqsattaǵy ozyq jabdyqtar shyǵaratyn zaýyttar bar. Biz eksporttaýshy da bola alamyz. Bizdiń tehnıkalarymyzdyń eksporttalatyny da jasyryn emes», - dedi A. Lınnık agenttik tilshisine bergen suhbatynda.

Depýtat osylaısha shekaramyzdyń nyǵaıǵanyn bilýge bolatynyn jáne UQShU-ǵa qatysýshy elderge ýaqytyly kómek kórsete alatynymyzdy jetkizdi.

«Mundaı oqıǵalardyń nege sol aýdandarda bolatyny eshkimge qupııa emes, óıtkeni shekarada turaqsyz Aýǵanstan bar. Tıisinshe, janjal shyǵarýǵa múddeli belgili bir toptar bar. Munyń turmystyq janjal emestigine senimdimin. Uıyqtap jatqan toptar aýyq-aýyq bas kóterýde. Oǵan nazar aýdarǵanymyz da durys. Bul jaǵdaıda UQShU qatysýshy elder basa mán berýi kerek, óıtkeni eki tarap ta UQShU quramynda. Bálkim kezdesý uıymdastyryp, osy másele boıynsha belgili bir strategııany ázirlep, talqylaý kerek shyǵar. Jáne ony budan ári qaıtalanbaýy úshin qısyndy qorytyndy túıý kerek», - dedi Andreı Lınnık.

Eske sala ketsek, keshe Tájikstan men Qyrǵyzstan shekarasynda qaqtyǵys bolyp, eki eldiń áskerı qyzmetshileri Batken aýdanyna qarasty Tórt-Kóchó degen jerde bir-birine oq jaýdyrdy.

Qarýly qaqtyǵys saldarynan shekarashylar, sonymen qatar tájik tarapynan beıbit turǵyndar mert bolǵany týraly aqparat bar.