Qyrǵyz tasymaldaýshylarynyń zań buzýshylyqtary jıiledi - IDM
ASTANA. QazAqparat - 2017 jyldyń 1 qańtary men 14 qarashasy aralyǵynda Qazaqstan aýmaǵynda Qyrǵyzstannyń 22 192 júk kóligi tekserildi. Olardyń 1376-da zań buzýshylyq anyqtalǵan, dep habarlaıdy QazAqparat QR IDM baspasóz qyzmetine silteme jasap.
Bul zań buzýshylyqtyń sany 2016 jyldyń kórsetkishinen asyp túsken. Naqtyraq aıtqanda, byltyr Qyrǵyzstan tasymaldaýshylary zańnamany 1141 ret buzǵan.
«Eń jıi kezdesetin zań buzýshylyqtar - taýar-kólik júk qujatynyń (CMR) bolmaýy (516 ret), salmaq jáne gabarıt parametrlerin saqtamaý (288 ret), tez búlinetin júkterdi tasymaldaý sertıfıkatynyń bolmaýy (288) jáne kabotajdy tasymal jasaý (166 ret)», - dep habarlaıdy mınıstrliktiń baspasóz qyzmetinen.
Vedomstvonyń habarlaýynsha, basqa zań buzýshylyqtardyń qatarynan jolaýshylardy turaqsyz tasymaldaýǵa arnalǵan qazaqstandyq ruqsat blankileriniń bolmaýy, halyqaralyq qatynastaǵy QR-nyń avtokólikpen tasymaldaý júıesiniń ruqsattama erejelerin qoldanýdy buzý, júkterdi tasymaldaý erejelerin buzý jaǵdaılaryn atap ótýge bolady.
Sonymen qatar, qyrǵyz tasymaldaýshylary qaýipti júkterdi tasymaldaý erejelerin buzý, órt qaýipsizdik erejelerin buzý jáne taǵy basqa zań buzýshylyqtarǵa jol berip jatady.
