Qyrǵyz tarapy ýaǵdaǵa qaramastan sýdy kelisilgen kólemde bermeýi múmkin - vıtse-mınıstr

NUR-SULTAN. QazAqparat – Qyrǵyz tarapy ýaǵdalastyqqa qaramastan sýdy kelisilgen kólemde bermeýi múmkin. Bul týraly QR Ekologııa, geologııa jáne tabıǵı resýrstar vıtse-mınıstri Serik Qojanııazov aıtty, dep habarlaıdy QazAqparat tilshisi.

«Sý az bolǵanda 2021 jylǵy vegetatsııalyq kezeń ońtústik óńirlerde óte qıyn ótti. Ýaqytyly qabyldanǵan sharalardyń nátıjesinde fermerlerdi kóp shyǵynsyz sýarmaly sýmen qamtamasyz etýge múmkindik týdy. Osy jyldyń vegetatsııasy da qıyn jaǵdaıda ótedi. Almaty oblysynda sýarý alańy 472 myń gektardy quraıdy. Sý resýrstarynyń tapshylyǵyn azaıtý maqsatynda oblys ákimdigi ylǵal syıymdy daqyldardyń, onyń ishinde Balqash aýdanynda kúrishtiń 1 myń gektar egistigin tómendetýdi josparlap otyr. Oblystyń barlyq sý qoımalary jınaqtaý rejıminde», - dedi ol mınıstrliktiń alqa májilisinde.

Onyń atap ótýinshe, Jambyl oblysy boıynsha sýarý alańy - 182 myń gektar.

«Qyrǵyz tarapymen ýaǵdalastyqqa qaramastan, memleketaralyq sý obektileri boıynsha kelisilgen kólemdi tolyq almaý qaýpi bar. Budan basqa, oblys boıynsha sýarý jelilerin qaıta qurý boıynsha aýqymdy jumystar júrgizilýde. Sýarmaly sýdy berý aınalma kanaldar arqyly júzege asyrylatyn bolady. Bul tıisinshe sýdyń joǵalýyna ákeledi», - dedi vıtse-mınıstr.

Osyǵan baılanysty ol oblys ákimdigine sý únemdeý tehnologııalaryn barynsha qoldaný, sondaı-aq sýarý tehnologııalaryn saqtaý boıynsha fermerlermen túsindirý jumystaryn júrgizý usynylǵanyn aıtty.

«Kezektilikti saqtaı otyryp, sý aınalymy ádisimen sharýashylyqtar arasynda sý bólý jumysy jalǵasady. Jalpy, osy eki oblys boıynsha aldaǵy vegetatsııa ótken jyldyń deńgeıinde ótedi dep josparlanǵan», - dedi Serik Qojanııazov.

Sýret: saigez.kz