Qyrǵyz shekarasyndaǵy qazaqstandyqtyń ólimi: Jedel shtab quryldy
ASTANA. QazAqparat - Qyrǵyzstan shekarasynda kóz jumǵan bolǵan Qazaqstan azamatynyń denesi týystaryna berildi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat.
«Bizdiń konsýl Talas oblysynda oqıǵa bolǵan jerde bolyp qaıtty. Jergilikti bılik ókilderimen kezdesý barysynda oqıǵaǵa qatysty obektıvti tergeý júrgizý qajettigine nazar aýdardy. Qyrǵyz tarapy quqyq qorǵaý organdary bul iste jan-jaqty kómek kórsetetinine sendirdi. Konsýldyń kómegimen mert bolǵan Qazaqstan azamatynyń máıiti týystaryna berildi», - deıdi mınıstrlik ókili.
Onyń aıtýynsha, qazirgi tańda Qazaqstan men Qyrǵyzstannyń quqyq qorǵaý, shekara qyzmeti jáne jergilikti bılik organdarynyń ókilderinen jedel shtab qurylyp, óz jumysyn bastady.
«Bizdiń Bishkektegi elshiligimiz bul isti erekshe baqylaýǵa alyp, qyrǵyz tarapymen únemi baılanysta. Sonymen qatar, búgin bul másele jóninde Qazaqstan men Qyrǵyzstannyń syrtqy saıası vedomstvolarynyń basshylary Beıbit Atamqulov pen Chıngız Aıdarbekov telefon arqyly sóılesti», - dedi A. Smadııarov.
Eske salsaq, keshe qazaq-qyrǵyz shekarasynda atys bolyp, oqıǵa ornynda otandasymyz mert boldy.
Kóp uzamaı elimizdiń syrtqy mınıstrligi oryn alǵan oqıǵaǵa qatysty túsinikteme berdi.
