Qyrǵyz shekarashylary Qazaqstannan kontrabandalyq jolmen janar-jaǵarmaı ótkizetin shlangty anyqtady (FOTO)
BІShKEK. QazAqparat - Qyrǵyz Respýblıkasynyń Memlekettik shekara qyzmeti basqarmasynyń Shý oblysy boıynsha «Tokmok» shekara zastavasynyń shekarashylary Qazaqstannan Qyrǵyzstanǵa janar-jaǵarmaı JJM (dızeldik otyn) zańsyz, jasyryn ótkizetin shlangty anyqtady. Bul týraly Qyrǵyz Respýblıkasy MShQ-niń baspasóz qyzmetinen habarlady.
Shlang shekara mańyndaǵy Shý ózeniniń jaǵasyndaǵy jerge kómilip, odan ári sý astymen Qyrǵyzstan-Qazaqstan memlekettik shekarasy arqyly ótken. Jaǵarmaı shlangynyń uzyndyǵy shamamen 1500 metr, dıametri - 500 mm.
Shekarashylar shlangty anyqtaǵany týraly quzyrly organdarǵa habarlady. Qazirgi ýaqytta tergeý amaldary júrip jatyr.
