Qyrǵyz sarapshysy Qazaqstan jáne Ózbekstanmen birlesken GES qurylysy týraly aıtty

ASTANA. QazAqparat – Qyrǵyz Respýblıkasynyń Prezıdenti janyndaǵy Ulttyq strategııalyq zertteýler ınstıtýtynyń dırektory Qanatbek Azız «Qazaqstan - Ózbekstan - Qyrǵyzstan» úshtiginiń «Qambar Ata-1» gıdroelektr stantsııasyn birlesip salý jobasynyń keleshegi týraly pikir bildirdi, dep habarlaıdy QazAqparat tilshisi.

«Qambar Ata-1» GES-i qandaı sharttarmen salynatynyn aıtý áli erte. Óıtkeni úsh eldiń arasynda jalpy qurylys týraly ortaq ýaǵdalastyq qana bar. Eń bastysy, sý resýrstarynyń problemasy úsh eldi de aınalyp ótpeıtini týraly ortaq túsinik bar», - dedi ol QazAqparat tilshisine «Ortalyq Azııa-2030: Bolashaqtyń kelbeti» atty sarapshylar kezdesýi aıasynda.

Onyń aıtýynsha, Qyrǵyzstan sarapshylary da 2030 jyldan bastap óz elderinde aýqymdy sý problemalary bastalýy múmkin ekenin aıtyp, dabyl qaǵyp jatyr.

«Araldyń qurǵaýy, ózge de kólderdegi qurǵaqshylyq jáne taǵy basqa problemalar bar. Muzdyqtardyń erip, klımattyń ózgerýi, kúnniń jylynýy sııaqty máseleler jáne bar. Osy problemalardy jarııa túrde, aqyldasa otyryp sheshý kerektigi týraly paıymynyń úsh taraptan da aıtylyp jatqany mańyzdy ári ýaqtyly dep esepteımin.

Úsh eldiń energetıka salasyna jaýapty mınıstrlik basshylary qol qoıǵan kelisim der kezinde jasalǵan mańyzdy qadam dep esepteımin. «Qambar Ata-1» GES-in salý jobasy sýdyń ǵana máselesi emes, sondaı-aq energetıkalyq qaýipsizdik máselesi de.

Eń bastysy, Qyrǵyz tarapy bul jobaǵa kelisim berip otyr. Óıtkeni nysan bizdiń aýmaqta boı kóteredi. Qazir álemdegi ýshyqqan jaǵdaı Ortalyq Azııaǵa birtutas qurylym retinde qaraýymyzǵa ıtermelep otyr», - dedi Qanatbek Azız.

Foto:twitter.com/trtavazkirgizca