Qyrǵyz Prezıdenti parlamenttik saılaýdan keıin ǵana otstavkaǵa ketedi – Tolǵanaı Stamalıeva
NUR-SULTAN. QazAqparat – Qyrǵyz Respýblıkasy Prezıdentiniń baspasóz hatshysy Tolǵanaı Stamalıeva Sooronbaı Jeenbekov pen Premer-Mınıstr Sadyr Japarovtyń kelissózderi barysynda qandaı máseleler talqylanǵanyn aıtyp berdi, dep habarlaıdy QazAqparat Kabar agenttigine silteme jasap.
Onyń aıtýynsha búgin Parlament eldiń Premer-Mınıstri laýazymyna Japarovtyń kandıdatýrasyn bekitkennen keıin Sooronbaı Jeenbekov pen Sadyr Japarov kezdesý ótkizgen.
«Premer-Mınıstr kezdesý barysynda óz talabyn qoıdy – Prezıdent búgin keshke otstavkaǵa ketýi kerek. Sooronbaı Jeenbekov dál qazirgi ýaqytta prezıdent laýazymyn tastap ketýge quqyǵy joqtyǵyn taǵy bir márte aıtty, sebebi munyń arty memleketke zııan shekkizip, elestetýge qıyn jaǵdaıǵa aparyp soqtyrýy múmkin. Ol 2020 jyldyń 9 qazanynda aıtqan ustanymyn eske saldy – parlamenttik saılaý ótkennen keıin eldiń jańa prezıdentin saılaý ótedi», - dedi Stamalıeva.
Eske salsaq, búgin Qyrǵyz Respýblıkasynyń Prezıdenti Sooranbaı Jeenbekov búgin, 14 qazan kúni «Qyrǵyz Respýblıkasynyń Premer-mınıstri men Úkimet múshelerin taǵaıyndaý» týraly Jarlyqqa qol qoıdy. Sondaı-aq, Qyrǵyz Jogorký Keneshiniń tóraǵasy saılandy.4 qazan kúni Qyrǵyzstanda Jogorký Keneshke depýtattardy saılaý ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi.
Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, odan keıin Aq úıge bettedi. Olardy tarqatý úshin mılıtsııa kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boıynsha, aýrýhanaǵa zardap shekken 16 adam jetkizilgen. Keıingi málimet boıynsha, zardap shekken adamdar sany 911-ge jetti.
Eldiń Іshki ister mınıstrligi mıtıngti uıymdastyrýshylar men partııa basshylaryn óz jaqtastaryn úılerine qaıtarýǵa shaqyrdy.
