Qyrǵyz Prezıdenti EAEO elderi ekonomıkasyndaǵy alshaqtyqqa alańdaýshylyq tanytty

NUR-SULTAN. QazAqparat - Eýrazııalyq ekonomıkalyq odaqtyń ortaq elektr energııasy naryǵyn retteý jónindegi organyn qurý qajet. Bul týraly búgin elordada ótken Joǵary Eýrazııa ekonomıkalyq keńesiniń keńeıtilgen quramdaǵy otyrysynda Qyrǵyz Respýblıkasynyń Prezıdenti Sooronbaı Jeenbekov aıtty, dep habarlaıdy QazAqparat tilshisi.

«EAEO-ǵa múshe memleketterdiń ekonomıkasy arasyndaǵy aıtarlyqtaı alshaqtyqpen baılanysty ózekti máselege nazar aýdartqym keledi. Odaq elder arasyndaǵy alshaqtyqtyń saqtalý tendentsııasy tolyqtaı alǵanda eýrazııalyq ıntegratsııanyń damýyna teris yqpal etýi múmkin. Biz ekonomıkany nyǵaıtý jáne úılesimdi damýy men jaqyndasýyn qamtamasyz etý máselesi boıynsha pátýaly sheshim tabýymyz qajet», - dedi Qyrǵyz Prezıdenti.

Osy rette ol Eýrazııalyq ekonomıkalyq komıssııaǵa elderdi qoldaýdyń túrli tetikterin saraptaýǵa jáne olardy engizý boıynsha naqty usynystar ázirleýge tapsyrma berýdi usyndy.

«Buǵan qosa, qazirgi ýaqytta biz ortaq elektr energııasy naryǵyn quryp jatyrmyz. Ortaq elektr energııasy naryǵyn retteý jónindegi organ qurýdyń maqsatqa saı ekendigin qaraýdy usynamyn. Qyrǵyzstan elektr energııasy jóninen áleýetti eskere otyryp, mundaı organdy ózinde ornalastyrýǵa daıyn», - dedi Qyrǵyz Respýblıkasynyń Prezıdenti Sooronbaı Jeenbekov.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Belarýs Respýblıkasynyń Prezıdenti Aleksandr Lýkashenko, Reseı Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonmen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.