Qyrǵyz Parlamentiniń spıkeri depýtattardy qalǵan bir jarym aı merziminde jemisti jumys atqarýǵa shaqyrdy
BІShKEK. QazAqparat - Búgin Qyrǵyz parlamentarııleri jumysqa kiristi. Jogorký Keneshtiń V shaqyrylymy sessııasynyń ashylýynda Parlament spıkeri Asylbek Jeenbekov depýtattardy qalǵan bir jarym aıda ókildikteriniń merzimi aıaqtalýyna deıin jemisti qyzmet atqarýǵa shaqyrdy.
«Bir-bir jarym aı qaldy, komıtet, fraktsııalarda paıdaly, jemisti jumys atqaraıyq. Óz qyzmetterimizdi laıyqty oryndaıyq», - dep atap ótti óz sózinde A.Jeenbekov.
Onyń aıtýynsha, qazan aıynda taza saılaý ótkizilip, sodan keıin bılikti kelesi shaqyrylymǵa beıbit tabystaý bolmaq.
«Búgin biz úılestirý keńesin ótkizip, onda jumystyń kelesi tártibin anyqtaımyz», - dep túıindedi Spıker.
Eske sala keteıik, eldiń joǵary zań shyǵarýshy organy - Jogorký Kenesh saılaýy aǵymdaǵy jyldyń 4 qazanynda ótedi. OSK-niń málimetterinshe, saılaýǵa ókilderi 120 depýtat mandaty úshin talasatyn 14 saıası partııa qatysady.
