Qyrǵyz ónimderiniń Reseı Federatsııasyna Qazaqstan arqyly tasymaldaýyna ruqsat berildi
Mundaı sheshimge 2016 jyldyń 26 jeltoqsanynda Sankt-Peterbýrgtegi Eýrazııalyq ekonomıkalyq odaqtyń Joǵary keńesiniń ekonomıkalyq komıssııasynda qol jetkizilgen. Oǵan sáıkes, Qyrǵyzstan aýyl sharýashylyq ónimderiniń 102 taýary elimiz arqyly Reseıge, ary qaraı Belarýs naryqtaryna shyǵa alady. Degenmen qazaq-qyrǵyz memlekettik shekarasy aýmaǵynda sanıtarlyq-veterınarlyq baqylaý saqtalǵan.
Vıtse-mınıstrdiń sózine qaraǵanda, bul sheshim Qyrǵyzstannyń Kedendik Odaqqa enýi aıasyndaǵy negizgi mindettemelerdiń birin oryndaý maqsatynda jasalyp otyr.
"Qyrǵyzstanmen aradaǵy taýaraınalymyn arttyrý maqsatynda, veterınarlyq-sanıtarlyq baqylaýda turǵan qyrǵyzstandyq ónimderdiń Qazaqstan aýmaǵy arqyly Reseıge tranzıttelýin, sonymen qatar Qyrǵyzstannyń mal jáne balyq sharýashylyǵy ónimderin elimizdiń ońtústik óńirlerine jetkizilýin qamtamasyz etý usynyldy", - dedi G. Isaeva.
Búgingi tańda EAEO múshe-memleketteriniń ókiletti ınspektsııalyq organdarynyń birlesken qorytyndysy boıynsha qyrǵyzdyń 15 mekemesi reseılik naryqqa jáne 8 mekeme qazaqstandyq naryqqa (ońtústik aımaqqa) veterınarlyq baqylaýǵa jatatyn belgili bir taýarlardy jetkizýge múmkindik aldy. Mysaly, termıkalyq (jylý) óńdeýden ótken sút ónimderi, daıyn et jáne balyq ónimderi.
Onymen qosa, QR Aýyl sharýashylyǵy mınıstrliginiń jáne «Qazaqstan temir joly» AQ-nyń «Qyrǵyzstan Respýblıkasynan Reseı Federatsııasyna Qazaqstan Respýblıkasynyń terrıtorııasy arqyly karantındik fıtosanıtarlyq baqylaýǵa jáne veterınarlyq-sanıtarlyq baqylaýǵa jatatyn karantındik ónimderdi temir jol kóligimen tranzıtteý tártibin bekitý týraly» buıryǵyna sáıkes, Qazaqstan terrıtorııasy arqyly qyrǵyzstandyq karantın ónimderin Reseıge tranzıtteý 2017 jyldyń 1 qańtarynan bastap, temir jol kóligimen qazaq-qyrǵyz memlekettik shekarasy aýmaǵyna kirgende - Lýgovoı Eksp beketimen, RF terrıtorııasyna shyqqanda - Iletsk Eksp beketi arqyly júrgiziledi.
