Qyrǵyz halqyn qysta elektr energııasy tapshylyǵy kútip tur
BІShKEK. QazAqparat – Qyrǵyzstanda aldaǵy qysta elektr energııasy tapshy bolady. Bul týraly Qyrǵyz Respýblıkasy Mınıstrler kabınetiniń tóraǵasy Aqylbek Japarov Facebook paraqshasynda málimdedi, dep habarlaıdy QazAqparattyń menshikti tilshisi.
Úkimet basshysy Qyrǵyzstan halqyna jasaǵan úndeýinde energetıka sektorynda másele bar ekenin moıyndap, el azamattaryn elektr energııasyn únemdeýge jáne shydamdy bolýǵa shaqyrdy.
«Ózenderdiń joǵarǵy jaǵynda ornalassaq ta, qysta elektrdi basqa elderden ımporttaımyz. Aqshaǵa satyp alamyz. Sol sebepti, kezinde tez arada jańa SES qurylysyn bastaýdy usynǵan bolatynmyn, kóp uzamaı alǵashqy SES agregaty «Qambar ata-2» quryldy. Bul Keńes odaǵy ydyraǵannan keıin salynǵan alǵashqy sý elektr stantsııasy bolatyn. 2020 jylǵa deıin elde basqa SES salynǵan joq. Qazirgi ýaqytta elektr energııasyn paıdalaný qajettigi memleket pen halyqta eki ese ósti. Allaǵa shúkir, 2020 jyly bılikke kelgen prezıdent Sadyr Japarov bul máseleni birden sezdi. Úkimettiń birinshi otyrysynda eki negizgi mindet qoıdy: múmkindiginshe tezirek SES qurylysyn bastaý, sodan keıin temirjol qurylysyn jandandyrý. Qazir biz elýge jýyq shaǵyn jáne ortasha SES, sondaı-aq ǵasyr qurylysy dep ataýǵa bolatyn «Qambar ata» SES salyp jatyrmyz», - dep jazdy Mınıstrler kabınetiniń basshysy.
Energosektordaǵy jaǵdaıdy túsindirgen Aqylbek Japarov barlyq SES qurylysyn aıaqtaýǵa ýaqyt kerek ekenin, biraq olardy salyp, paıdalanýǵa bergennen keıin Qyrǵyzstan elektr energııasy tapshylyǵyn jeńip, eksporttaýshy elge aınalatynyn atap ótti.
Qyrǵyz Respýblıkasy Mınıstrler kabınetiniń tóraǵasy ózenderdegi sý deńgeıi tómendeýine baılanysty aldaǵy qysta eldi elektr energııasy tapshylyǵy kútip turǵanyn habarlady. Turǵyndardy aldaǵy úsh jylda shydamdy bolyp, elektr energııasyn únemdeýge shaqyrdy.
«SES qurylysy ýaqyt, nazar aýdarý men kúshti qajet etedi. Qazir biz elektr energııasyn Reseı, Túrikmenstannan kórshilerimiz arqyly ımporttaımyz. Degenmen, osy qysta Qazaqstan men Ózbekstan elektr energııasyn qýat jetpeıtindikten tranzıt arqyly ótkize almaıdy. Olardyń ózine de jetpeı jatyr. Sol sebepti, qurmetti otandastar, bizdi, qazirgi úkimetti túsinip, elektr energııasyn osy sátten bastap únemdeısizder dep úmittenemiz. 2020 jylǵa deıin Qyrǵyzstan qysta elektr energııasyn kórshi elderden qolma-qol satyp alatyn. Al jazda kórshiles elderge sýarýǵa sý jiberetin (halyqaralyq norma boıynsha, bıikte ornalasqan elder tómendegi elderge sý jiberýge mindetti). Sadyr Japarovtyń kelissózi arqasynda biz qysta elektr energııasyn kórshiles elderden alamyz, jazda qaıtaramyz. Biz sýdy bosqa jibermeımiz, biz ony súzgi arqyly aǵyzyp, odan shyqqan elektr energııasymen qysta kórshiles elderden alatyn elektrdi jabamyz. 2020 jyldan beri osylaı jumys istep, memleket qarjysyn únemdep kelemiz. Elimizde beıbitshilik pen turaqtylyq bolsa – bári jaqsy bolady. Qyrǵyzstannyń tutastyǵyn buzýdy qalaıtyn úshinshi kúshter joq emes. Biz, bılik ókilderi, bos qarap otyrǵan joqpyz. Kúndiz-túni sý elektr stantsııasynyń qurylysyn baqylap, jumys istep jatyrmyz. Qudaı kúsh berse, bári jaqsy bolady. Sizge bar qajeti – tózim ǵana. Qysqa daıyndalaıyq!» - delingen Aqylbek Japarovtyń Qyrǵyz halqyna úndeýinde.
