Qyrǵyz eliniń týmasy Boston marafonyndaǵy lańkestikke qatysty istiń 5-shi fıgýranty boldy
ASTANA. QazAqparat - Qyrǵyz eliniń týmasy, Kýınsı qalasynyń (Massachýsets shtaty) turǵyny 23 jasar Haırýllojon Matanov aǵaıyndy Johar men Tamerlan Tsarnaevtarmen dostyǵy men baılanysy, sondaı-aq fılosofııa turǵysynan zorlyq-zombylyqty aqtaý taqyrybynda olarmen áńgimeleskenin jasyrýǵa tyrysqan, dep habarlady «Interfaks».
Qorytyndy qujatta jazylǵandaı, ol qujattardy jáne basqa da materıaldyq nysandardy, atap aıtqanda kompıýterdi joıýǵa, ózgertýge tyrysqan. Osydan keıin ol federaldyq tergeýshilerge birqatar jalǵan aıǵaqtar bergen.
Osylaısha, Matanov Boston marafonyndaǵy jarylys týraly istiń besinshi qatysýshysy bolyp shyǵa keldi. Ol Qyrǵyzstan azamaty bolyp tabylady, 2010 jyly AQSh-qa zańdy túrde kelgen. Sodan beri Massachýsetste turyp, taksı júrgizýshisi bolyp jumys istegen.
Eske sala keteıik, 2013 jyldyń 15 sáýirinde Boston marafonynda eki jarylys oryn alyp, saldarynan 3 adam ajal qushty, 200-ge jýyǵy japa shekti. Keıin polıtsııa lańkesti jasaǵan eki kúdiktiniń izine shyǵyp, olar AQSh-ta zańdy túrde turyp jatqan Soltústik Kavkazdyń týmasy aǵaly-inili Tamerlan men Johar Tsarnaevtar bolyp shyqty.
Osy lańkestik is boıynsha Tsarnaevtyń úsh dosy qazaqstandyq Dıas Qadyrbaev pen Azamat Tájaıaqov jáne amerıkalyq Robel Fılıpposke Boston marafonynyń máresinde bolǵan jarylysqa qatysty isti tergeýge kedergi keltirdi dep aıyp taǵyldy.
Azamat Tájaıaqovtyń soty mamyrdyń 30-na belgilense, Dıas Qadyrbaevqa qatysty qozǵalǵan qylmystyq is qyrkúıektiń 8-i kúni qaralmaq.
Bostondaǵy jarylysty uıymdastyrǵan Johar Tsarnaevpen sybaılasyp, aıǵaq zattardyń kózin qurtty dep aıyptalǵan otandastarymyz kináli dep tanylsa 25 jylǵa abaqtyǵa toǵytylýy múmkin.
