Qyrǵyz depýtatyn qamaý merzimi 6 aıǵa sozyldy
ALMATY. QazAqparat - Almaty soty Qyrǵyz Jogorký Keneshiniń depýtaty Damırbek Asylbekulyn qamaý merzimin 6 aıǵa sozý týraly sheshim shyǵardy.
Bul týraly QazAqparat tilshisine qalalyq sottyń baspasóz qyzmeti habarlady.
«Damırbek Asylbekulyna qatysty bultartpaý sharasy týraly Almaly aýdandyq sotynyń sanktsııasy 15 tamyzǵa deıin sozyldy», - dedi baspasóz qyzmetinen.
Eske salaıyq, aǵymdaǵy jyldyń aqpan aıynda ońtústiktegi 3 oblys pen Almaty qalasynda júrgizilgen arnaıy operatsııa barysynda 35 adam ustaldy.
Olardyń arasynda keden organynyń, shekara qyzmetiniń laýazymdy tulǵalary, brokerler, deldaldar, sondaı-aq uıymdasqan qylmystyq top músheleri bar. Arasyndaǵy úsheýi Qyrǵyzstan azamaty. Onyń biri - Qyrǵyzstannyń Jogorký Keneshiniń depýtaty Damırbek Asylbek.
Keıin ol mandatynan aıyryldy. Sot sanktsııasymen 35 kúdiktiniń 33-i qamaýǵa alyndy. Arnaıy operatsııa barysynda memlekettik shekaranyń Qazaqstan-Qytaı aımaǵynda ornalasqan Altynkól, Qaljat jáne Qorǵas keden beketteri, Qazaqstan-Qyrǵyzstan aımaǵynda ornalasqan Qordaı men Qarasý beketteri men Qazaqstan-Ózbekstannyń Saryaǵash, Qazyǵurt, Atameken, Qaplanbek shekara aımaqtary arqyly taýarlardy kontrabandalyq jolmen tasymaldaý anyqtalǵan.
