Qyrǵyz depýtattary demalys kúnin jumaǵa aýystyrýdy usyndy
ASTANA. 13 naýryz. QazAqparat - Parlamenttegi «Ar-Namys» fraktsııasynyń depýtattary Eńbek kodeksine ózgerister engizý jóninde zań jobasyn ázirledi.
Onda demalys kúnin jumaǵa aýystyrý týraly usynys ta bar.
muslim.kz saıtynyń jazýynsha, osy fraktsııanyń atynan saılanǵan halyq qalaýlysy Tursynbaı Bákiruly bul bastama azamattarǵa dinı quqyǵyn qorǵaýǵa múmkindik beredi dep otyr. Sondaı-aq ol juma kúni qulshylyǵyn óteý úshin musylmandardyń deni jumys ornyn tastap ketýge májbúr bolatynyn alǵa tartyp, osy qujattyń mańyzyn tilge tıek etti.
Sonymen qatar, Qyrǵyzstan halqynyń 85 paıyzy musylmandar ekenin de eske salyp ótti.
Eger atalmysh zań jobasy alty kúndik jumys aptasy negizinde qabyldanatyn bolsa, Qyrǵyzstan halqy juma kúni, al bes kúndik jumys aptasynda juma jáne senbi kúnderi demalady. Tursynbaı Bákirulynyń aıtýynsha, mundaı ózgeristiń ekonomıkalyq nemese áleýmettik zardaby joq. Qosymsha qarjyny da qajet etpeıdi.
