«Qyran» komandasynyń fýtbolshylary 7 aıdan beri jalaqy almaǵan
TÚRKІSTAN. QazAqparat - Túrkistan oblystyq qarjy basqarmasy «Qyran» fýtbol komandasynyń jetekshilerine kelisimshart talaptaryn oryndamaǵany úshin eskertý joldady. Bul jóninde oblys ákiminiń baspasóz qyzmetine silteme jasap QazAqparat habarlaıdy.
Oblys ákimdigi jeti aıdan beri jalaqy almaǵan «Qyran» fýtbol komandasynyń sportshylaryna qatysty máselege alańdap otyr.
Aıta keteıik, «Qyran» fýtbol komandasy úsh jyl buryn 10 jyl merzimge A.B.Isabaev esimdi azamattyń senimgerlik basqarýyna ótken. Osyǵan deıin qarjy tapshylyǵyna tap bolǵanyn aıtyp, kómek suraǵan ujym jetekshilerin Túrkistan oblysy ákiminiń orynbasary men jaýapty basqarma jetekshileri qabyldaǵan bolatyn.
«Qyran» fýtbol komandasynyń jaǵdaıymen jiti tanysqan ákimdik ókilderi eń aldymen sportshylardyń jalaqy máselesin sheshýdi nazarǵa alýdy basa aıtqan. Fýtbol klýbynyń máselesine qatysty oblystyq dene shynyqtyrý jáne sport basqarmasy basshylyǵy, qarjy basqarmasy men strategııa jáne ekonomıkalyq damý basqarmasy basshylyǵy baspasóz máslıhatyn ótkizdi.
Túrkistan oblysy qarjy basqarmasynyń málimetinshe, senim artylǵan jaq kelisimshart talaptaryn oryndamaǵan. Tıisti taldaý jumystarynyń negizinde málim bolǵany - A.B. Isabaev oblystyq sport basqarmasynyń kelisiminsiz qyzmetkerler jalaqysyn kóterip, birneshe ret dırektoryn aýystyrǵan. Bıylǵy bıýdjetten bólingen 281 mıllıon qarajat byltyrǵy qaryzǵa, dálirek aıtqanda 2018 jyly «Qyran» komandasy janynan zańsyz ashylǵan ekinshi lıga komandasynyń oıyndaryna maqsatsyz jumsalǵan.
Anyqtalǵan birneshe zańsyzdyqtyń nátıjesinde qarjy basqarmasy memleket tarapynan qarjylandyrylatyn «Qyran» fýtbol komandasynyń jetekshilerine kelisimshart talaptaryn oryndamaǵany úshin eskertý joldady. Kelisimshart buzylǵan sátten bastap 10 kún ishinde múlik memleketke qaıtarylýy tıis. Eger de senimgerlik basqarýshy bul talaptarǵa kelispeıtin bolsa, qarjy basqarmasy sotqa berýge quqyly.
