«Qyraǵy kóz» qazaq tilindegi qatelerdi anyqtamaq
ASTANA. Qyrkúıektiń 9-y. QazAqparat /Arman Asqarov/ - Búgin QR Memlekettik tildi damytýdyń Prezıdenttik qory jáne «Nur Otan» partııasynyń bastamasymen elorda boıynsha «Qazaqsha sóıleseıik!» aktsııasy aıasyndaǵy «Qyraǵy kóz» aılyǵy bastaldy, dep habarlaıdy QazAqparat.
Halyq tutynatyn taýarlarda qazaq tilindegi mátinderdiń qatelerin anyqtaýǵa baǵyttalǵan is-sharanyń basty maqsaty - memlekettik tildi burmalaýdy áshkerelep, qazaq tiliniń qoldaný aıasyn keńeıtý. Memlekettik tildi damytýdyń Prezıdenttik qorynyń dırektory Azat Sháýeevtiń aıtýynsha, jaqynda elordadaǵy dúkenderdiń birinde «Mıaso dlıa deteı» dep atalatyn taýardyń qazaq tilindegi nusqasyn «Balalar eti» degen aýdarmamen satylyp jatqandyǵy anyqtaldy. Budan basqa qazaq tilindegi etıketkalarda grammatıkalyq jáne stılıstıkalyq qateler kóptep kezdesedi. Al Reseıden keletin keıbir taýarlarda qazaq tilindegi birde bir nusqaýlar berilmeı jatyr. «Bir aıǵa jalǵasatyn aktsııaǵa barlyq azamattar qatysa alady. ol úshin qazaq tilinde qate jazylǵan etıketka-nusqaýlardy kóptep jınap, «Jas Otan» jastar qanatynyń Astana qalalyq bólimshesine tapsyrý qajet. Osy bastamaǵa qatysqan alǵashqy 20 azamat Memlekettik tildi damytýdyń Prezıdenttik qory taǵaıyndaǵan arnaıy syılyqtarǵa ıe bolady», - deıdi A.Sháýeev.
Kor basshysy atap kórsetkendeı, otandyq zańnamaǵa sáıkes halyq tutynatyn taýarlardaǵy eskertý-nusqaýlar mátinderine Standarttaý jáne sertıfıkattaý komıteti, sondaı-aq Til komıteti jaýapty.
Aıta keteıik, «Qyraǵy kóz» aılyǵynyń qorytyndysy qazan aıynda jarııalanady. Oǵan deıin qatesi bar taýarlardy Táýelsizdik kóshesi, 3 meken-jaıy boıynsha ornalasqan «Jas Otan» jastar qanatynyń Astana qalalyq bólimshesine tapsyrýǵa bolady.
