«Qymyzdyń otany sanalatyn Qazaq elinde qasıetti sýsynnyń qadirin bilmeı otyrǵanymyz ókinishti» - respýblıkalyq basylymdarǵa sholý
***
«Almaty áýejaıyna tumandy Albıonnyń tórine tý tikken tolaǵaı ul - Ilıa Ilın mingen ushaq keshe ińirde kelip qondy. Olımpııa oıyndarynyń eki dúrkin chempıonyn kútip alýǵa asyqqan jurtta qısap bolmady. Aǵylshyn jerine senimmen attanyp, jeńispen oralǵan batyr uldy halqy tóbesine tik kóterip, qaharmanǵa laıyq qurmetin aıamady», - dep jazady «Egemen Qazaqstan» gazeti búgingi sanyndaǵy «Almaty alyp uldy qarsy aldy» degen taqyryptaǵy maqalasynda. Basylymnyń atap ótýinshe, sonaý 1999 jyldan beri kóbesi buzylmaı turǵan álemdik rekordty jańalap, qazaqtyń áleýetin tanytqan Ilıa Ilındi qarsy alýǵa elimiz Parlamentiniń jáne Almaty qalalyq máslıhatynyń depýtattary, qala ákiminiń orynbasary, sondaı-aq kóptegen BAQ ókilderi bastaǵan toppen birge chempıonnyń týystary, alystan arnaıy kelgen qalyń jankúıer qaýym saltanatty túrde gúl shoqtarymen jınaldy.
«Egemen Qazaqstan» gazetiniń jazýynsha, keshe Qazaqstannyń Japonııadaǵy Elshisi Aqylbek Kamaldınov Hırosıma qalasyna tastalǵan atom bombasynan qaza tapqandardy eske alýǵa arnalǵan 67-shi beıbitshilik sharasyna qatysyp, Japonııanyń Premer-mınıstri Esıhıko Noda jáne basqa da mártebeli qonaqtarmen birge Hırosıma Memorıal baǵynda ornatylǵan kenotafqa gúl qoıdy. Sapar barysynda Elshi Japonııa Parlamenti Keńesshiler palatasynyń Prezıdenti Kendjı Hırata men Ókilder palatasy Spıkeri Takahıro Iokomıchımen kezdesti. «Japon saıasatkerleri Qazaqstannyń jáne Prezıdent Nursultan Nazarbaevtyń ıadrolyq qarýdy taratpaý rejimin nyǵaıtý men ǵalamdyq qaýipsizdikti qamtamasyz etýge qosyp otyrǵan erekshe úlesin joǵary baǵalaıtyndaryn aıtty», - dep jazady basylym. Maqala «Qazaqstannyń úlesi atap ótildi» degen taqyryppen berilgen.
***
«Alash aınasy» gazetiniń turaqty «Dat!» aıdarynda bıologııa ǵylymynyń doktory, professor Zulqarnaı Seıitovpen aradaǵy suhbat «Qymyzdyń otany sanalatyn Qazaq elinde qasıetti sýsynnyń qadirin bilmeı otyrǵanymyz ókinishti» degen taqyryppen berilgen. Basylym tilshisiniń barlyq saýalyna tuşymdy jaýap bergen ǵalym: «ıAkýtııada qymyz óndirý týraly arnaıy zań qabyldanǵan. Al Germanııada 50 jyldan beri bıe sútin óndirýshilerdiń memlekettik odaǵy jumys istp keledi. Sonymen birge Belgııa kondıterleri qymyzdan shokolad jasap shyǵara bastady. Osy kúni qymyz nemis halqynyń da súıikti sýsynyna aınalyp úlgergen», - deı kelip, qymyzdyń otany sanalatyn Qazaq elinde qasıetti sýsynnyń qadirin bilmeı otyrǵanymyzǵa ókinish bildirgen.
***
«Kóshe bazarynyń basy-qasynda qarııalar otyrady. Birde jastardyń «Abaıdy» saýdalap turǵanyn kórip, burylyp qaraǵan edik. Sóıtsek, «Abaı nos» dep atalatyn nasybaı eken. Qap-qara paket ishindegi «qus sańǵyryǵynyń baǵasy arzan», - dep jazady «Aıqyn» gazeti búgingi sanyndaǵy «Nasybaıǵa «Abaı nos» dep at qoıǵan» degen taqyryptaǵy maqalasynda. Basylymnyń atap ótýinshe, nasybaı paketinde «Abaı nos» dep jazylǵany bolmasa, shyǵarylǵan jeri, meken-jaıy týraly esh málimet joq.
«Aıqyn» gazetiniń jazýynsha, Sırııadaǵy saıası ahýalǵa baılanysty mundaǵy Qazaq eliniń azamattary elge oralyp jatyr. Qazirgi kúni bul memlekette 150-ge jýyq qazaqstandyq turady. Olardyń kópshiligi jergiliti turǵyndarmen turmys qurǵandar. Sonymen qatar jerlesterimizdiń arasynda 70-ke tarta kámelet jasyna tolmaǵan jasóspirimder bar. «Sońǵy aqparatqa sáıkes olardyń 70-i elge oraldy. Qazir úsh otbasy elge qaıtý jóninde aryz jazyp, kómek surap jatyr», - dep jazady basylym.
***
«Kazahstanskaıa pravda» gazetiniń jazýynsha, Parlament Májilisiniń Tóraǵasy, «Nur Otan» HDP Tóraǵasynyń birinshi orynbasary Nurlan Nyǵmatýlın Ortalyq apparattyń qoǵamdyq qabyldaýynda azamattardy jeke máseleleri boıynsha qabyldady. Nurlan Nyǵmatýlın múmkindigi shekteýli jandardy jumysqa ornalastyrý máselesi zańdyq deńgeıde qolǵa alynatyndyǵyn atap ótti. Al, «Jas depýtattar qaýymdastyǵy» respýblıkalyq qoǵamdyq birlestiginiń jetekshisi Oleg Tolkaılov «Tabysqa aparatyn jol» atty jastardyń shaǵyn is baǵdarlamasyna qoldaý kórsetilse degen usynyspen keldi.
