«Qymyzdyń qasıetin nemisten úırengenimiz qalaı?» - respýblıkalyq basylymdarǵa sholý
***
Keshe Memleket basshysy Nursultan Nazarbaev elordada qurylys jumystary qarqyndy júrgizilip jatqan mádenı-rýhanı jáne halyqty sýmen qamtamasyz etýge arnalǵan birqatar nysandardy aralap kórdi. Osyǵan oraı «Egemen Qazaqstan» gazetinde «Astananyń abattandyrylýy ózge qalalarǵa úlgi bolýy tıis» degen taqyryppen kólemdi maqala jarııalandy. Basylymnyń atap ótýinshe, Elbasy sondaı-aq Táýelsizdik saraıynyń mańyndaǵy jańa «Áziret Sultan» meshitiniń qurylysymen de tanysty. Meshit qurylysyn Túrkııanyń «Sembol» kompanııasy júrgizip jatyr. Bul ımandylyq úıi kelýshilerge esigin osy jyldyń aıaǵynda ashatyn bolady. Qurylys jumystarymen tanysqan Memleket basshysy osy jerde jýrnalısterge shaǵyn suhbat bergen.
Bıylǵy jyl elimiz úshin Qazaqstannyń Islam Konferentsııasy Uıymyna tóraǵalyq etýimen, Astanada Búkilálemdik ıslam ekonomıkalyq forýmynyń ótýimen erekshelenedi. Bul mańyzdy oqıǵalar bizdiń elimizge ınvestıtsııalyq kapıtaldy jáne ıslamdyq qarjylandyrý ındýstrııasyna iri-iri qatysýshylardy tartýdyń quraly bolyp tabylatyn ıslamdyq qarjylandyrýdyń keń óris alýyna jaǵdaı jasaıtyn bolady. «Egemen Qazaqstan» gazetinde «Islamdyq qarjylandyrýdyń erekshelikteri mol» degen taqyryppen QR Premer-Mınıstrdiń orynbasary - Indýstrııa jáne jańa tehnologııalar mınıstriniń keńesshisi Erlan Baıdaýletten alynǵan suhbatqa osy máseleler arqaý bolǵan.
***
Almatyda «Gastroenterologııa - 2011» halyqaralyq kongresi óz tusaýyn kesti. Bıe súti men odan ázirlenetin qymyzdyń emdik qasıetterin pash etip, onyń emdeý isinde jańa zamanǵa laıyq joldaryn talqylaýǵa arnalǵan bul jıynnyń Almatyda ótkizilýi - álbette qýanysh, alaıda Germanııadan kelgen qonaq Gans Tsolmannyń qymyzdyń paıdasy jóninde qazaq halqyna dáris oqýy barmaq tistetti. Osy jaıt arqaý bolǵan maqala «Aıqyn» gazetinde «Qymyzdyń qasıetin nemisten úırengenimiz qalaı?» degen taqyryppen jarııalandy. G.Tsolmannyń aıtýynsha, qymyz - nemis halqynyń da súıikti sýsynyna aınalǵan. Olar bıe sútiniń emdik qasıetin jaqsy meńgerip, túrli dári-dármek, balalar taǵamyn ázirleýge mamandanyp alypty.
«Appenın túbeginde veloshabandozdardyń «Djıro d'Italııa» kópkúndigi óz máresine jetti. Bul jarystyń tusaýy 7 mamyrda Týrın qalasynda kesilgen edi. Sol kezden beri tórtkúl dúnıeniń teńdessizderi «jan alysyp, jan berisip» aıqasty», dep jazady «Aıqyn» gazeti «Italııada bas júlde aldyq» degen taqyryptaǵy maqalasynda. Basylymnyń atap ótýinshe, jekelegen kezeńderde «Astananyń» veloshabandozdary bir márte ǵana top jardy. Bul jeńis ıtalııalyq Paolo Tıralongonyń enshisine jazyldy. Bergamo men Makýnıago aralyǵyn qamtyǵan 19 kezeńde ol aldyna jan salǵan joq.
***
«Alash aınasy» gazetiniń turaqty «Dat!» aıdarynda «Qazatomónerkásip» UK janyndaǵy «Joǵary tehnologııalar ınstıtýty» JShS-niń bas dırektory Serik Qojahmetovpen aradaǵy suhbat «Elimizdiń elektr taratý júıesiniń qýatty tok kózin taratýǵa shamasy kelmeıdi» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Qazaqstan qazaq atomshylarynyń birneshe býyny qalyptasqanda ǵana biz ózimizde naǵyz ǵylymı-tehnıkalyq zııaly qaýym bar dep maqtanyshpen aıta alamyz. Atom ónerkásibine aqyldy ári talantty da talapty jastar kóbirek kelse eken dep oılaımyn», - deıdi.
Osy basylymnyń jazýynsha, elimizdiń barlyq aımaǵynda janar-jaǵarmaıdyń bir lıtriniń baǵasy ortasha eseppen 3-5 teńgege ósti. Máselen, Almaty qalasynyń janar-jaǵarmaı quıý beketterinde AI-92 99-dan 102 teńgege, AI-80 84 teńgege, dızel otyny 88 teńgege artqan. Anyqtaı kelgende, baǵanyń bulaısha ózgerýi Munaı jáne gaz mınıstrliginiń maýsym aıynda janar-jaǵarmaıdyń shekti baǵalaryn 3-ten 7 paıyzǵa deıingi ósimmen belgileýimen baılanysty bolyp shyqty. Bul jaıynda gazettiń juma kúngi sanyndaǵy «Janar-jaǵarmaı baǵasynyń ósý sebebi nede?» degen maqaladan bile alasyzdar.
***
«Alǵash ret Los-Andjeleste 11-26 maýsym kúnderi qazaq kınosynyń festıvali ótedi», - delingen «Kazahstanskaıa pravda» gazeti búgingi sanynda jaryq kórgen «Nashı lıýdı v Gollıvýde» degen maqalada. Basylymnyń jazýynsha, amerıkandyqtarǵa pash etý úshin 10 kórkemfılm tańdap alynǵan. Olardyń qatarynda Aqan Sataevtyń «Reketır», Rústem Ábdirashevtiń «Stalınge syılyq», Ermek Shynarbaevtyń «Kek», Gúlshat Omarovanyń «Shıza», «Baqsy», Sergeı Bodrov, Ivan Passer, Talǵat Temenovterdiń birlesip túsirgen «Kóshpendiler» syndy fılmder bar. Kınoforýmdy elimizdiń AQSh-taǵy elshiligi uıymdastyryp otyr. Al ıdeıa avtory - sońǵy 7 jylda Gollıvýdta jemis eńbek etip júrgen qazaq aktrısasy jáne prodıýser Gaýhar Nurtas.
