Qymyzdy bir kezderi ótkize almasaq, qazir jaqsy tabys kózine aınaldy -aqtóbelik kásipker
AQTÓBE. QazAqparat -Aqtóbelik kásipker Orynbaı Jolmuratov 100 bıeni avtomatty túrde saýyp, qymyz pisip otyr. Ol ónimdi satyp alýshyǵa úsh kúnniń ishinde jetkizip beredi, dep habarlaıdy QazAqparat tilshisi.
Aqtóbe oblysynda «Qazaqstannyń úzdik taýary» kórme-baıqaýy ótti. Bul kórmege «Shyńǵys» sharýa qojalyǵy birinshi ret qatysyp otyr. Aýylda, sharýashylyqta júrgen Orynbaı Jolmuratov kóbine mundaı habardy estimeı qalady. Bul joly kórme-baıqaýda alystaǵy sharýalarǵa basymdyq bergen. Qymyzdy arnaıy ydysqa quıyp ákelgen sharýa jeńimpaz bolýǵa emes, ózin tanystyrýǵa kóp kóńil bóldi.
«Qymyzdy shyny ydysqa saqtaǵan durys. Biraq biz qymyz sapaly bolsyn dep bıeni oblys ortalyǵynan 500 shaqyrym jerde baǵamyz. Taza aýa, shóp te qunarly. Al tasý kezinde shyny ydys paıdalana almaımyz. Sondyqtan baklajkaǵa quıamyz. Qymyzda esh qospa joq. 2004 jyldan beri tasymaldap, satamyn. Biraq sońǵy 4 jylda arnaıy saýyn, qymyz pisý apparatyn satyp aldym. Áıteke bı aýdanynan kelgenshe shaıhanalar alady, al qalada bir ortalyqqa jetkizsem, adamdar ózderi keledi»,- dedi Orynbaı Jolmuratov.
Kásipker úıir-úıir jylqy ustaǵanymen tek 100 bıe saýyp otyr. Sebebi, suranysqa oraı qymyz shyǵarylady. Jylyna shamamen 100 tonna qymyz jetkiziledi.
«Bizde bıe arnaıy apparatpen saýylady. Mundaı apparat Aqtóbedegi ózge qymyz sharýashylyqtarynda joq. Negizi kásipti qarapaıym jolmen bastadym. 2000 jyldardyń basynda qymyzdy ákelip, bazar, vokzalda satyp júretin edim. Keıde adamdarǵa qymyzdy ótkize almadym. Al qazir jaqsy tabys kózine aınaldy. Sharýashylyqta 13 jumysshy bar. Aldaǵy ýaqytta túıe, sıyr ustap, saýyp, sút ónimderin shyǵarýdy josparlap otyrmyn»,- dedi Orynbaı Jolmuratov.
Kásipker 200 bıe saýýdy josparlap otyr. Ol úshin jyl boıy bıe saýyp, qymyz pisýge yńǵaıly ǵımarat salýy kerek. Usynys ázirge qoldaý tappady.
«Men el ishindegi baǵdarlamalardy bileımin. Dalada júrip, kóp jańalyqty kesh estip jatamyn. Al aıtyp, túsindirip, jolyn kórsetse, bıznesti damytýǵa ázirmiz»,- dedi ol.
Kásipker iri sýpermarketterge qymyz tapsyrmaıdy. Sebebi, ýaqyt ótken saıyn sút óniminiń sapasy joıylyp ketedi.
Aıta keteıik, «Qazaqstannyń úzdik taýary» kórme-baıqaýynyń oblystyq kezeńi qorytyndylandy. «Óndiristik maqsattaǵy úzdik taýar» nomınatsııasynda órtke qarsy kúres taýarlary zaýyty men arnaıy kıim tigetin sheberhana, Aqtóbe rels-arqalyq zaýyty jeńimpaz atandy.
Al «Úzdik azyq-túlik taýary» sút jáne sút ónimderin shyǵaratyn «Bolat LTD» JShS, «Aktıýbınskıı mıasnoı klaster» JShS jáne «Ramazan» JShS alda keldi. «Halyqqa arnalǵan úzdik taýar» nomınatsııasynda qaǵaz shyǵaryp, jıhaz jasaıtyndar úzdik atandy. Jeńimpazdar men joldama alǵan aqtóbelik kásipkerlerdi oblys ákimi Berdibek Saparbaev quttyqtap, alǵys hat berdi.
