Qymyz betti árlendiredi
ASTANA. QazAqparat - Qazaqtyń ulttyq sýsyny - qymyzdyń densaýlyqqa paıdasyn aıtpaǵanda, teri kútimine de jaǵymdy áseri kóp. Sol sebepti búginde ol kosmetıka salasynda keńinen qoldanyla bastady, dep jazady massaget.kz.
Adam aǵzasyn, terisin jasartatyndyqtan, qymyzdan shashqa arnaıy maskalar jasalady. Al Germanııada qymyzdan túrli átirler men sabyndar jasaý óndirisi damyp kele jatyr.
Bet terisin aǵartyp, ájimderdi azaıtatyn maskany árkim úı jaǵdaıynda op-ońaı jasaı alady. Onyń negizinde qymyz bolady. Maskany jasaý úshin 200 ml qymyz, jelkenniń úsh-tórt sabaǵy jáne jarty qııar qajet. Jasyl jelken men qııardy blenderden ótkizip, qymyzben aralastyramyz. Mundaǵy jasyl jelken betti árlendirip, kletkalardyń balǵyn qalpyn saqtaıdy. Al qııar betti ylǵaldandyrady. Maska tańerteń jáne keshke jasalady. 20 mınýt ustap, artynan jyly sýmen jýý kerek. Úsh kún saıyn jasaǵan jaǵdaıda maskanyń nátıjesi de aıtarlyqtaı bolady.
Qymyzdyń quramynda 28 mıkroelement bar. Bul sýsyn ásirese V, S dárýmenderine baı. Al atalmysh dárýmender bet terisiniń jasýshalaryn baıytyp, qartaıýdyń aldyn alady.
