Qymyz ben shubat týraly zań kerek - Q.Aıtahanuly
ASTANA. QazAqparat - Qazaqstanda qymyz ben shubat týraly arnaıy zań kerek. Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanuly osy máseleni kóterdi.
«Qymyz ben shubat - halqymyzdyń baıyrǵy sýsyny. Ǵasyrlar boıy qasıetti jylqy men túıe malyn asyraý, qymyz ben shubat daıyndaý jóninen halqymyzda baı tájirıbe qalyptasqan. Ulttyq sýsyn densaýlyqqa asa paıdaly: týberkýlez, baýyr, asqazan, júıke jáne ımmýndyq júıelerdiń, júrek jáne qan-tamyrlarynyń dertine daýa. Ókinishke qaraı, keshegi Keńes úkimetiniń tusynda jylqy men túıege, olardan alynatyn ónimge jasalǵan qııanat pen solaqaı saıasattyń saldarynan qymyz ben shubat óndirý isi báseńdep, umyt bola jazdady», - deıdi senator Qýanysh Aıtahanuly.
Bul rette depýtat egemen el bolyp otyrǵanda ata-babadan qalǵan kásipke basymdyq berýdiń mańyzdylyǵyn atap ótti. Onyń aıtýynsha, búginde qymyz ben shubatty ulttyq brendke aınaldyrýǵa mol múmkindik bar.
Sonymen qatar depýtat kezinde elimizde ókpe aýrýlaryn tek qymyzben emdeıtin 15 shıpajaı bolǵanyn, alaıda úkimet tarapynan qoldaý bolmaǵandyqtan, olardyń jumysy toqtap qalǵanyn atap ótti. Al kórshiles Reseıde qymyz óndiretin 80-nen astam agrofırma, qymyzben emdeıtin 48 shıpajaı jumys isteıdi. Sonymen qatar Reseı ǵalymdary bıe sútinde bolatyn laktoferrın aqýyzynan qaterli isikti emdeıtin dári jasap jatyr. Al Japonııa men batys elderi qymyz ben shubatqa erekshe qyzyǵýshylyq tanyta bastaǵan.
«Ata-babamyzdyń amanatyna adaldyq tanytyp, ardaqtaǵan asyn, súısine ishken sýsynyn ulttyq brendke aınaldyrý úshin qymyz ben shubat týraly zań qabyldanýy kerek. Onda bul sýsyndardy klassıkalyq daıyndaý úlgileri, sútke qoıylatyn talaptar, standarttar, fızıka-hımııalyq jáne ıis pen dámdik qasıetteri, saqtyq sharalary jazylýy tıis», - deıdi senator Qýanysh Aıtahanuly.
Budan bólek, senator qymyz ben shubat óndiretin fermalardy yntalandyrý úshin zańnamada jeńildikter qabyldanýy kerektigin de atap ótti.
«Elimizde qymyz ben shubat óndirý isin memlekettik deńgeıde qolǵa alyp damytsaq, bul Elbasymyz aıtqan ekonomıkany ártaraptandyrýdyń kórinisi bolmaq. Qymyz ben shubat týraly zańdy qabyldaý arqyly ata-babalarymyzdyń amanatyn aqtap, ómirdiń nári bolǵan sýsynnyń sapasyn saqtap, keler urpaqqa maqtanyshpen tapsyrǵan bolar edik», - deıdi Q.Aıtahanuly.
