Qymbat turatyn medıtsınalyq qyzmetterdiń qoljetimdiligi qamtamasyz etiledi - mınıstr

NUR-SULTAN. QazAqparat - QR Densaýlyq saqtaý mınıstri Alekseı Tsoı saladaǵy Ulttyq joba týraly aıtty, dep habarlaıdy QazAqparat tilshisi.

«Memleket basshysynyń 2020 jylǵy 1 qyrkúıektegi Qazaqstan halqyna Joldaýynda bergen tapsyrmalaryn iske asyrý aıasynda biz Qazaqstan Respýblıkasynyń densaýlyq saqtaý salasyn damytýdyń 2020-2025 jyldarǵa arnalǵan memlekettik baǵdarlamasyn Ulttyq jobaǵa kóshirý boıynsha jumysty bastadyq. Ulttyq jobanyń negizgi baǵyttary: «Densaýlyq saqtaýdy damytý», «Epıdemıologııalyq boljaý men oǵan den qoıýdyń qazirgi zamanǵy júıesin qalyptastyrý», «Qazaqstannyń otandyq farmatsevtıkalyq ónerkásibin qalyptastyrý», «Buqaralyq sportty damytý». Ulttyq jobanyń negizgi ulttyq ındıkatory 2025 jyly kútiletin ómir súrý uzaqtyǵynyń 75 jasqa deıin ulǵaıýy bolyp otyr», - dedi mınıstr halyq aldynda esep berý kezdesýinde.

«Deni saý ult» Ulttyq jobasyn iske asyrý nátıjesinde myna nátıjeler eskerilip otyr:

- barlyq kózderden kelip túsetin densaýlyq saqtaýdy qarjylandyrý kólemin eldegi JІÓ-niń 5% -ǵa deıin ulǵaıtý;

- ekstrakorporaldyq uryqtandyrýdy júrgizýge jyl saıyn 7 myń kvota bólý;

- óńirlerde 20 qazirgi zamanǵy medıtsınalyq ortalyq salý;

- aýyldyq eldi mekenderde 137 feldsherlik-akýsherlik, medıtsınalyq pýnktter men dárigerlik ambýlatorııalar ashý;

- MÁMS qarajaty esebinen árbir azamat úshin qymbat turatyn medıtsınalyq qyzmetterdiń qoljetimdiligin qamtamasyz etý;

- dárigerlerdiń ortasha jalaqysyn ekonomıkadaǵy ortasha jalaqydan 2,5 esege ulǵaıtý;

- otandyq óndiristiń dárilik zattary men medıtsınalyq buıymdarynyń úlesin 50% - ǵa deıin (qundyq máninde) ulǵaıtý.