«Qymbat» qalada eńbek etetin muǵalimge qandaı jeńildikter qarastyrylýda
ASTANA. QazAqparat - Astana jáne Almaty sekildi «qymbat» qalalardaǵy muǵalimderge qandaı jeńildikter qarastyrylyp jatyr? Ol týraly Bilim jáne ǵylym mınıstrliginde ótken basqosýda «Pedagogtar mártebesi týraly» zań jobasyn daıarlaýshy jumys tobynyń múshesi, Astana qalasynyń gýmanıtarlyq kolledjiniń dırektory Eldos Nurlanov tarqatyp aıtyp berdi, dep habarlaıdy QazAqparat tilshisi.
«Jyldyq eńbek demalysy berilgende búgingi tańda azamattyq qyzmetkerlerge jatatyn, ıaǵnı mekemeler men qazynalyq kásiporyndar formasynda eńbek etetin pedagogtar jylyna bir ret saýyqtyrýǵa arnalǵan bir laýazymdyq aılyq aqyǵa teń járdemaqy alady. Biz bul kólemdi birden eki esege arttyrýdy, múmkin bolsa tek azamattyq qyzmetkerlerge ǵana emes, qalǵan pedagogtarǵa berý múmkindigin usynyp otyrmyz», - deıdi ol.
Eldos Nurlanovtyń aıtýynsha, jalpy oqý oryndary jergilikti atqarýshy organdardyń quzyrynda, qarjylandyrýynda bolǵandyqtan, olarǵa qosymsha kótermeleý, yntalandyrý sharalaryn júzege asyrýǵa quqyq berý kerek.
«Sonyń ishinde mysaly aımaqtyq «Úzdik pedagog» baıqaýyn ótkizý jón bolady. Іri - Astana, Almaty qalalarda ómir aıtarlyqtaı qymbat. Soǵan baılanysty tıisti ústemaqy qarastyrý múmkindigin, turǵyn úı sertıfıkatyn berý, pedagogtardyń balalaryna balabaqshada kezekten tys oryn berý, sanatorıı sapary jáne qoǵamdyq kólikte júrip turýynyń aqysyn óteý, jas muǵalimderdiń qyzmet etýine kómektesetindeı járdemaqy qarastyrý usynylýda. Óıtkeni, ár aımaqtyń múmkindigi ártúrli. Degenmen, mundaı múmkindik bolǵan jaǵdaıda tekserýshi organdardyń tarapynan suraqtar bolmas úshin, mundaı quqyqtyń baryn bilip júrýi úshin bul normanyń zań jobasynda qaralǵany mańyzdy dep sheshtik», - deıdi Eldos Nurlanov.
Eske sala ketsek, Memleket basshysy Nursultan Nazarbaev Qazaqstan halqyna Joldaýynda 2019 jyly Qazaqstanda «Pedagogtardyń mártebesi» týraly Zań qabyldaý kerektigin aıtqan edi.
