Qylyshyn jalańdatqan qytaılyq Beıjińdegi saýda ortalyǵyna kelgenderge shabýyl jasady
ASTANA. QazAqparat - Beıjińniń Chaoıan aýdany Sanlıtýn kóshesiniń boıynda ornalasqan saýda ortalyǵynda keleńsiz jaǵdaı oryn aldy.
Adamdarǵa shabýyl jasaǵan Tszılın provıntsııasynyń 25 jastaǵy turǵynyn polıtseıler qolǵa túsirdi.
Bul qytaılyq azamattyń qolyna qylysh alyp, jól-jónekeı ótken adamdarǵa shabýyl jasaǵany belgili boldy. Onyń bul áreketinen qytaılyq áıel men frantsýz japa shekti. Olardyń esimderi anyqtalmady.
Japa shekkender aýrýhanaǵa jetkizildi. Alaıda áıel adam alynǵan jaraqattar saldarynan aýrýhanaǵa bara jatqan jolda ajal qushty. Polıtseılerdiń sózine qaraǵanda, qytaılyqtyń beıtanys adamdarǵa nelikten shabýyl jasaǵany belgisiz. Tergeý amaldary júrgizilip jatyr.
