Qylshyq shyqqan farshqa qatysty sýpermarket túsinikteme berdi
ASTANA. QazAqparat - Áleýmettik jeliler men messendjerlerde maldyń júni aralas farshtyń vıdeosy tarap júr. Beınebaıannyń avtory ol farshty Stepnogorsk qalasyndaǵy «SMALL» sýpermarketinen satyp alǵanyn aıtady, dep habarlaıdy QazAqparat tilshisi.
«Búgin aqpannyń 9-y, «SMALL»-dan farsh aldyq, manty istedik. Sol farshtan istegen kezde kórgen joqpyn, jeıtin kezde, mine, qylshyqtar kórinip tur ma? Maldyń júni, bul - sıyrdyń tartylǵan eti. Mynanyń ishi -tolǵan shash. Stpenogorsk qalasyndaǵy «SMALL»-dan satyp aldyq. Sumdyq! Úlkender jep aldyq, balalar qaıta jegen joq. Jańa kishkene qalǵan bir farshty qarasam, ishinde dáp-dákóı shash júr ǵoı. Sondyqtan «SMALL»-dan sıyr etinen tartylǵan etti múldem almańyzdar», - deıdi vıdeonyń avtory.
QazAqparat tilshisi Stepnogorsk qalasyndaǵy «SMALL» sýpermarketiniń basshylyǵyna habarlasyp, máseleniń mán-jaıyn bildi. «Skıf Treıd» JShS soltústik aımaq boıynsha dırektory Gúlnur Batyrhanovanyń aıtýynsha, sýpermarkette et ónimderi satylmaıdy. «Biz et ónimderin múldem satpaımyz. Farsh ta, et te kassadan ótpeıdi. Biz óz ornymyzdy jalǵa alyp otyrmyz. Týra janymyzda etti satady. Biraq olardyń bizge eshbir qatysy joq. Kassalarymyz salyq organdaryna qosylǵan. Sol arqyly tekserip kórseńiz de bolady. Bizde et ónimderi saýdalanbaıdy. Ony múldem basqa kásipkerler satady. Men olardyń atyn da aıta alamyn. Ol - jeke kásipker «Saǵynaeva». Barlyq suraqtardy soǵan qoıý qajet», - dedi G.Batyrhanova.
Al jeke kásipker Anar Saǵynaevanyń aıtýynsha, qylshyq qosylǵan farshqa qatysty eshkim aryzdanǵan joq. «Men ózim «SMALL»-dan bir oryndy jalǵa alyp, et satýmen aınalysamyn. Bylaısha aıtqanda, sýbarendada otyramyn. Anaý vıdeony men de kórdim. Biraq ondaı etke qatysty eshkim aryzdanbady, túbirtegin kórsetip, etti keri qaıtarǵan adam da bolǵan joq. Menińshe, bunyń barlyǵy - básekelesterdiń qıturqy áreketi. Men ózim 1998 jyldan beri et satýmen aınalysamyn. Osy ýaqytqa deıin birde-bir adam aryzdanǵan joq. Qazir qaladaǵy eki saýda ortalyǵynda ornym bar. Básekelester sony kóre almaıdy. Meni yǵystyryp, ornymdy tartyp alǵysy keledi. Men olardy jaqsy bilemin. Biraq kim ekenin aıtpaı-aq qoıaıyn», - dedi A.Saǵynaeva QazAqparat tilshisine bergen suxbatynda.
Onyń aıtýynsha, manty jasaıtyn adam farshqa tuz, burysh jáne taǵy basqa dámdeýishterdi qosady. Sol kezde qylshyqtar da, artyq zattar da - bári-bári kórinedi. Ony mantyny pisirmeı turyp, anyqtaýǵa bolady.
