Qylmysyn moıyndaǵany úshin jazadan bosatý tártibi qatańdatylmaq

ASTANA. QazAqparat – Ádilet mınıstrligi qylmystyq zańnamadaǵy kinásin moıyndaǵany úshin jazadan bosatý týraly baptarǵa túzetý engizýdi usynyp otyr. Bul týraly vıtse-mınıstr Alma Muqanova Májilis depýtattaryna «Qazaqstan Respýblıkasynyń keıbir zańnamalyq aktilerine Qylmystyq, Qylmystyq-protsestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» Zań jobasyn tanystyrǵan kezde aıtty, dep habarlaıdy QazAqparat tilshisi.

«Qylmystyq zańnyń jalpy erejelerin jetildirý sheńberinde protsestik kelisim boıynsha kináni moıyndaý nysanynda qylmystyq jaýaptylyqtan bosatýdy alyp tastaý usynylady», - dedi ol.

Aıtýynsha, qazirgi tańda protsestik kelisim 2 nysanda jasalady. Onsha aýyr emes, aýyrlyǵy ortasha ne aýyr qylmystar boıynsha – kúdikti, aıyptalýshy keltirilgen kúdikpen, aıyptaýmen kelisken jaǵdaıda kináni moıyndaý týraly mámile jasalyp, sonyń negizinde jaýaptylyqtan bosatylýy múmkin.

Sondaı-aq, qylmystyq top jasaǵan qylmystardy, ózge de adamdar jasaǵan asa aýyr qylmystardy, sondaı-aq ekstremıstik jáne terrorıstik qylmystardy ashýǵa jáne tergep-tekserýge yqpal etý kezinde barlyq sanattaǵy qylmystar boıynsha yntymaqtastyq týraly kelisim bekitilgen kezde jaýaptylyqtan bosatý kózdelgen.

«Qylmystyq zań protsestik kelisimniń barlyq sharttaryn oryndaǵan adamnyń qylmystyq jaýaptylyqtan bosatylýy múmkin ekenin belgileıdi Bul Qylmystyq kodekstiń 67-babynda kórsetilgen.

Protsestik kelisim nemese «tergeýmen mámile» kezinde adam kináni moıyndaıdy, dáleldemeler men zalaldyń mólsherine daý aıtpaıdy, tergeý men sot jedeldetilgen tártippen júredi, ıaǵnı kináni dáleldeý úshin memlekettiń ýaqyty men qarajaty únemdeledi.

Alaıda, joǵaryda atalǵan protsestik kelisimniń eki nysany arasynda túbegeıli aıyrmashylyq bar: eger birinshi jaǵdaıda sottalýshy tek óziniń kinásin moıyndap qana qoısa, ekinshi jaǵdaıda onyń qylmysty odan ári ashýǵa belsendi járdemdesýi talap etiledi. Bul eki nysanda qylmystyq is qaralyp jatqan sottalýshylardy teń emes jaǵdaıǵa qoıady.

Bul rette, is júzinde kináni moıyndaý týraly mámile mindetti túrde sottyń aıyptaý úkimimen aıaqtalady jáne jazanyń eń joǵary merziminiń nemese mólsheriniń jartysynan aspaıtyn jaza taǵaıyndalady (QK 55-babynyń 3-bóligi). Eger sot kináni moıyndaý týraly mámilemen kelispese, onda ol isti prokýrorǵa ádettegideı tergeýdi uıymdastyrý úshin qaıtarady. Osylaısha, QK-niń 67-babynyń erejeleri is júzinde kináni moıyndaý týraly mámilege qoldanyla almaıdy.

Osyǵan baılanysty osy baptyń qoldanylý aıasyn yntymaqtastyq týraly is júrgizý kelisiminiń barlyq sharttaryn oryndaý jaǵdaılarymen ǵana shekteý usynylady», - dedi Alma Muqanova.