Qylmysy sotta dáleldengen qarjy pıramıdalaryna qaıta qarajat tartý jıilep barady

ASTANA. QazAqparat - Qazaqstanda qylmystyq áreketi sotta dáleldengen qarjy pıramıdalaryna qaıta qarajat tartý jaǵdaılary jıilep barady, dep habarlaıdy Qarjylyq monıtorıng agenttiginiń baspasóz qyzmeti.

«Qazaqstanda qylmystyq áreketi sotta dáleldengen qarjy pıramıdalaryna qaıta qarajat tartý jaǵdaılary jıilep barady. Olardy burynǵy jalǵan ınvestıtsııalyq qyzmettiń oıdan shyǵarylǵan turaqtylyǵyn kórsetip, tanymal ataýlardy, aqsha tartýdyń birdeı ádisterin qoldanatyn aram pıǵyldy adamdar ashady» delingen habarlamada.
Buǵan deıin Qarjylyq monıtorıng agenttigi «LV Force», «World Business Consulting», «The Finico», «Caspian Crocus», «B2B Jewelry», «PK Elimaı-2019», «Mebelnyı proekt Nýr», «Lıder», «Lıder kapıtal-168», «Narymbetova», «Hermes -LTD» jáne t.b. sııaqty qarjylyq pıramıdalardyń qyzmetine tosqaýyl qoıǵan bolatyn.
Olar qarapaıym messendjerlerden bastap bilim berý kýrstary men jyljymaıtyn múlik satyp alýǵa deıin ártúrli qyzmet túrlerin usynyp, azamattardan aqsha alýdyń qylmystyq shemalaryn júzege asyrǵan.
»Kompanııalar qarjy pıramıdasy bolyp, halyq jınaǵan qarajatynan aıyrylyp jatqanyna qaramastan, keıbir azamattar qylmyskerlerdiń jarnamalyq naýqandaryna ilinip, aqsha salýdy jalǵastyrýda.
Osyǵan baılanysty Qarjylyq monıtorıng agenttigi profılaktıkalyq jumystarǵa basa nazar aýdaryp, oqýshylar men stýdentter arasynda qarjylyq qaýipsizdik jáne saýat ashý sabaqtaryn ótkizip, qarjylyq pıramıda belgileri bar saıttar men akkaýnttardy anyqtaý úshin zamanaýı tehnologııalardy qoldanýda.
Azamattardy qyraǵy bolýǵa, jınaqtaryn kúmándi qarjylyq kompanııalarǵa salmaýǵa shaqyramyz! Eger siz nemese sizdiń jaqyndaryńyz qarjy pıramıdasynyń qyzmetine tap bolsa, bul týraly Qarjylyq monıtorıng agenttigine dereý habarlaýyńyzdy suraımyz», - dep habarlaıdy agenttiktiń baspasóz qyzmeti