Qylmystyń ósimi - olardy tirkeý júıesiniń jetildirilýi esebinen boldy-Bas prokýratýra
ASTANA. 10 aqpan. QazAqparat - Qylmystyń ósimi - olardy tirkeý júıesiniń jetildirilýi esebinen boldy. Bul týraly búgin Astanadaǵy baspasóz máslıhatynda QR Bas prokýratýrasy Quqyqtyq statıstıka jáne arnaıy esepke alý jónindegi komıtet tóraǵasy Marat Ahmetjanov málim etti.
Keńestik kezeńnen beri kele jatqan qylmysty jasyryp qalý dástúrine tosqaýyl qoıylyp otyrǵandyǵyna toqtalǵan tóraǵa, «bul búgingi kúnniń talabyna saı, múldem jańa kózqaras. Osy máselege osylaısha jańasha kelip, jurtshylyqtan túsken barlyq aryz-shaǵymdardy tirkeýdiń ashyqtyǵyn qamtamasyz etip, memleketimizdiń tarıhynda alǵash ret elimizdegi qylmys deńgeıin shynaıy kórsetýge qol jetkizip otyrmyz»,-dedi. Bul turǵyda ásirese júıege jappaı engizilgen qylmysty elektrondy túrde tirkeý ádisi keńinen qoldanylyp otyr.
«2011 jyly tirkelgen qylmystar sany 57 paıyzǵa, al aýyr jáne asa aýyr qylmys túrleri 30 jáne sáıkesinshe 19 paıyzǵa artty. Bular naqty kórsetkishter dep esepteımiz. Óıtkeni olar buryn dástúrli túrde jasyrylyp kelgen. Máselen, osyndaı qylmystardyń qatarynda urlyq 102, 7 paıyzǵa, tonaý 68 paıyzǵa, buzaqylyq 56 paıyzǵa ósken»,-dedi M. Ahmetjanov.
Tirkelgen qylmystar sanynyń kóp deńgeıi Astanada (237 paıyz), Qyzylorda oblysyna (100 paıyz), Qostanaı oblysynda (84 paıyz) baıqaldy. «Búginde qylmystardyń shynaıy kórtketkishine qol jetkizdik dep senip aıtýǵa bolady. Ústimizdegi qańtar aıynda ótken jyldyń sáıkes kezeńimen salystyrǵan kezde, tirkelgen qylmystardyń deńgeıi 114 paıyzǵa ósti. Bul degenimiz byltyrǵy qańtarda 9 myń qylmys tirkelgen bolsa, bıyldyń birinshi aıynda 19 myńnan astam qylmys belgili boldy»,-dedi tóraǵa. Sonyń ishinde aýyr qylmystar 75 paıyzǵa, al asa aýyr qylmys 21 paıyzǵa artty.
Sonymen qatar, urlyq boıynsha 168 paıyzǵa, tonaý-139 paıyzǵa, qaraqshylyq - 56 paıyzǵa, adam densaýlyǵyna aýyr zardap keltirý -16 paıyzǵa, alaıaqtyq - 150 paıyzǵa ósti.
«Bul shyn máninde qylmystardy tirkeýge neǵurlym shynaıy kelýdiń nátıjesi bolyp tabylady»,-dedi M. Ahmetjanov. Osy qylmystar týraly habarlamalardy qabyldaý, esepke alý men tirkeý satysynda ınnovatsııalyq tehnologııalardyń engizilýi tıisti nátıje berip otyr.
«Jalpy elimizdegi qylmystyq ahýal ýshyqqan joq»,-dep túıindedi komıtet basshysy.
