Qylmystyń aldyn alýǵa jaqsy kóńil bólsek keleńsiz jaǵdaılar bolmaıdy-Ó. Qopabaev

Bul búgin Almatyda ótip jatqan "Adam quqyǵyn qorǵaýdy qylmystyq-protsessýaldyq salada qamtamasyz etýdegi kepildikter" dep atalatyn dóńgelek ústel májilisinde aıtyldy.

"Qazir bizde qylmystyq jazalardy azaıtyp, ákimshilik jazaǵa kóshirý jáne keıbir ákimshilik jazalardy qylmystyq jazaǵa aýystyrý máselesi talqylanyp jatyr. Soǵan baılanysty kóp zańdarǵa ózgerister men tolyqtyrýlar engizilýde. Biraq solardyń keıbireýi shyn máninde durys jasalmaı jatyr. Osyǵan oraı búgin quqyq qorǵaý organdarynyń basshylary, ǵalymdar jınalyp sol máseleni talqylaıyn dep otyr", - deıdi Qazaqstan krımınalısteri qaýymdastyǵynyń prezıdenti Ómiráli Qopabaev.

QR Prezıdenti janyndaǵy quqyqtyq saıasat keńesi múshesiniń aıtýynsha, bizde bas bostandyǵynan aıyrý jazalary kóbeıip ketti. Qazir olardy aıyp tóleýge jáne ákimshilik quqyqtyq jazalarǵa aýystyrý máselesi qaralýda. Áıtse de keıbir jaǵdaıda keleńsiz jáıtter orny alýda. Mysaly, tutynýshylardy aldaý týraly máseleni qylmystyq jazadan ákimshilik jazaǵa aýystyrý jaıy sóz bolýda.

QR Joǵary mektep akademııasynyń akademıgi Ómiráli Qajybaıulynyń paıymdaýynsha, bul durys emes. Ekonomıkalyq qylmys jasaǵan adamdardy bas bostandyǵynan aıyrmaı aıyp tóletip, qara jumysqa jáne basqa da jazalardy qoldaný máselesi jan-jaqty talqylanýy kerek.

"Qazir bizdiń basty máselemiz - qoldanystaǵy zańdardyń turaqtylyǵyn qalyptastyrý bolyp otyr. Óıtkeni Parlamentte kúnde ózgerister men tolyqtyrýlar jasalyp jatyr. Ony aqyldasyp túbegeıli sheshý kerek dep oılaımyn. Qylmystyń aldyn alý máselelerine jaqsy kóńil bólip, ǵalymdardyń usynys-tilegine qulaq túretin bolsaq keleńsiz jaǵdaılar bolmaıdy. Bas bostandyǵynan aıyrý kóbeıip, túrme tolyp ketti dep aıtýǵa negiz bolmaıdy. Qazir bizde qylmystyń aldyn alýdy zertteıtin ınstıtýt joq. Sondyqtan Іshki ister mınıstrligi janynan arnaıy ǵylymı-zertteý ınstıtýtyn qurý kerek",- deıdi D. Qonaev atndaǵy ýnıversıtettiń rektory, zań ǵylymynyń doktory Ó. Qopaev.