Qylmystyń aldyn alý maqsatyndaǵy baıqap kórý qyzmeti engiziletin boldy
ASTANA. 19 qańtar. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine baıqap kórý qyzmeti
máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda qarady. Qujatqa birqatar ózgerister engizilip, qabyldandy.
Zań jobasynyń maqsaty sottalǵan adamnyń júris-turysyn odan ári túzetý, jańa qylmystar jasaýynyń aldyn alý jáne jábirlenýshige zalaldy óteý úshin oǵan áleýmettik-quqyqtyq kómek kórsete otyryp, oǵan qatysty baqylaýdy júzege asyrý úshin QR Іshki ister mınıstrliginiń qylmystyq atqarý júıesinde baıqap kórý qyzmetin engizý bolyp tabylady. Qujatqa sáıkes mundaı baqylaý shartty túrde sottalǵandarǵa qatysty sot aıqyndaǵan merzim ishinde engiziledi.
Bul rette zań jobasymen Qylmystyq, Qylmystyq is júrgizý, Qylmystyq-atqarý kodeksterine jáne 5 zańǵa túzetýler engizý kózdelgen bolatyn.
Qujatty ekinshi oqylymda talqylaý barysynda senatorlar birqatar ózgerister engizdi. Atap aıtqanda, zań jobasynyń probatsııa qyzmetin Іshki ister mınıstrliginiń qylmystyq-atqarý júıesine engizý týraly erejesi tolyqtyryldy. Qylmystyq is júrgizý, qylmystyq-atqarý zańnamasynyń normalary naqtylandy.
Budan bólek, túzeý mekemelerine poshta jóneltilimderi arqyly tyıym salynǵan zattardy berýge umtylǵany úshin ákimshilik jaýaptylyqty kúsheıtý qarastyryldy. Sonymen qatar, ishki ister organdaryna jeke tulǵalardy kúzetý jónindegi ókilettikterdi berý usynylǵan.
Parlament qabyldaǵan zań Memleket basshysynyń qol qoıýyna jiberiledi.
