Qylmystylyq deńgeıi tómendedi - QR ІІM
ASTANA. QazAqparat - QR Іshki ister mınıstriniń orynbasary Rashıd Jaqypov elimizdegi qylmystylyq ahýalyna qatysty túsinik berdi, dep habarlaıdy QazAqparat.
«Sońǵy bes jylda Qazaqstanda qylmystylyq deńgeıi tómendeý úrdisin kórsetip keledi. Bul aýyr jáne asa aýyr qylmystarǵa da qatysty. Sonymen qatar, ótken jyly alǵash ret urlyq sekildi keńinen taraǵan qylmystyń túri boıynsha faktiler azaıdy», - dedi ol Astanada ótken baspasóz máslıhatynda.
Osy oraıda Rashıd Jaqypov elimizdiń óńirlerinde jergilikti bılik organdary quqyq qorǵaý organdarymen birlese aldyn alý sharalaryn qabyldap jatqanyn jetkizdi.
«Qalalar men kósheler beınebaqylaý kameralarymen, turǵyn úı keshenderi de osyndaı júıelermen jabdyqtalýda. Kóńil kóteretin oryndarǵa qatysty baqylaýdy kúsheıtýdemiz. Bul baǵyttaǵy jumystar óziniń nátıjesin berip keledi. Jalpy, qylmystylyq deńgeıi azaıýda. Sońǵy jyldardaǵy statıstıkaǵa qarasaq, bul kórsetkishterdi kórýge bolady. Búginde árbir is boıynsha sotqa deıingi tergeý bastalady. Onyń maqsaty - janjaldyń mán-jaıyn zerttep, aıyptylardy anyqtaý», - dedi mınıstrdiń orynbasary.
Onyń paıymynsha, qylmystylyqty jalǵyz polıtsııanyń kúsh-jigerimen joıý múmkin emes.
«Meniń oıymsha, qoǵam men quqyq qorǵaý organdary shynymen de birigip jumys istese, onda qylmystylyqpen kúreste eleýli ilgerileýshilik jasaımyz», - dep túıdi ol.
Aıta keteıik, Rashıd Jaqypov baspasóz máslıhatynda Denıs Tenniń ólimine qatysty taraǵan qaýesetterge jaýap berdi.
