Qylmystyq jazasyn ótegen adamdardy áleýmettik beıimdeý men ońaltýdy uıymdastyrý ákimdikterdiń qaraýyna ótedi

Búgin QR Ádilet mınıstrliginde ótken brıfıng barysynda Elbasynyń «Qazaqstandaǵy quqyq qorǵaý qyzmeti men sot júıesiniń tıimdiligin arttyrý jónindegi sharalar týraly» Jarlyǵy boıynsha júrgizilip jatqan reformaǵa toqtalǵan vedomstvonyń resmı ókili Erbolat Erimbet osylaı málim etti.

«Elbasy jarlyǵyna oraı, birqatar fýnktsııalar mınıstrliktiń qaraýyna ótedi. Atap aıtqanda, atqarýshylyq qujattardy oryndaý, jekelegen negizder boıynsha respýblıkalyq menshikke aınalǵan múlikti esepke alý, saqtaý qyzmetteri mınıstrlikke ótedi. Budan bólek, baǵalaý jáne odan ári paıdalaný jónindegi, sondaı-aq arnaýly qabyldaý oryndarynda ákimshilik qamaýǵa alý túrinde ákimshilik jazany oryndaý fýnktsııalary da ádilet organdaryna beriledi. Al Ádilet mınıstrliginiń qylmystyq jazasyn ótegen adamdardy áleýmettik beıimdeý men ońaltýdy uıymdastyrý, júzege asyrý fýnktsııalary jergilikti atqarýshy organdar qaraýyna beriletin bolady», dedi E. Erimbet.

Onyń aıtýynsha, Sot ákimshisinen Ádilet mınıstrligine barlyǵy 2 myń 97 birlik beriledi. Onyń ishinde 22 birlik Sot ákimshiligi komıtetinen berilse, 2 myń 75 birlik aýmaqtyq organdardan beriletin bolady. «Jarlyqtyń erejelerin iske asyrý maqsatynda Ádilet mınıstrligi basqa da ýákiletti memlekettik organdarmen birlesip birqatar sharalar atqaratyn bolady. Atap aıtqanda, bas bostandyǵyn shekteýge sottalǵandardyń, shartty túrde sottalǵandardyń, shartty túrde merziminen buryn sotttalǵandardyń tıisinshe júrip-turýyn, onyń ishinde elektrondyq quraldardy keńinen paıdalana otyryp baqylaýdyń nysandary men ádisterin jetildirýge basa nazar aýdarylady», dedi resmı ókil.