Qylmystyq jazalaýdy alyp tastaý qajet - sheteldik ınvestorlar

ASTANA. QazAqparat - Astanada QR Prezıdenti janyndaǵy Sheteldik ınvestorlar keńesiniń 31-shi plenarlyq otyrysy bastaldy. Sol jerde sheteldik kompanııalar óz usynystaryn jarııalady, dep habarlaıdy QazAqparat tilshisi.

«Sheteldik ınvestorlardyń qazaqstandyq keńesi» qaýymdastyǵynyń basshysy Agrıs Preımanıstiń aıtýynsha, sońǵy otyrystan keıin birneshe jumys toby qurylyp, árbireýi óz usynystaryn ázirledi.

«Birinshiden, adam kapıtalyn áli de jaqsartý qajet. Ásirese, qazirgi ozyq tehnologııalardy eskere otyryp, maman daıarlaý máselesine basa nazar aýdarǵan jón. Sebebi sapaly jumys kúshi áli de jetispeı jatyr. Ondaı problemaǵa sheteldik ınvestorlar ǵana emes, jergilikti kompanııalar da tap bolýda. Dál osy másele bıznesti damytýǵa qolbaılaý bolyp otyr. Ekinshiden, jańa Ekologııalyq kodeksti birlesip ázirleý kerek. Búginde Qazaqstan qorshaǵan ortany qorǵaý máselesine erekshe kóńil bólip keledi. Alaıda normatıvtik aktilerdi ázirlegende qazaqstandyq óndiristiń jahandyq básekelestigin de eskerý kerek. Sonyń nátıjesinde ekonomıkalyq ósim de bolady. Bizdińshe, aıyppuldardy salǵan kezde naqty dálelder bolýy qajet. Sosyn ekonomıkalyq zalaldy janama baǵalaýdy alyp tastaǵan durys», - dedi A.Preımanıs búgingi otyrysynda.

Budan bólek, sheteldik ınvestorlar salyqty óz erkimen tólegen jaǵdaıda qylmystyq jazalaýdy alyp tastaýdy usynyp otyr. Sebebi salyqtan jaltarý kezinde qylmystyq jaza qarastyrylǵan. Osy oraıda olar iri jáne asa iri zalaldyń kólemin qaıta qaraý qajet dep sanaıdy.

«Sosyn sheteldik kompanııalardyń fılıaldary men bólimshelerine qatysty qazirgi valıýtalyq retteýdi qaldyrý qajet», - dep atap kórsetti A.Preımanıs.

Jıyn barysynda QR Investıtsııalar jáne damý mınıstri Jeńis Qasymbek Sheteldik ınvestorlar keńesiniń jumys tıimdiligi týraly aıtty.