Qylmystyq zańnamany izgilendirýge qatysty qujat kúshine ense, sottalǵandar sany 8 myńǵa qysqarady - dóńgelek ústel otyrysy
ASTANA. 10 jeltoqsan. QazAqparat /Aıdar Ospanalıev/ - Parlamentte qaralyp jatqan qylmystyq zańnamany izgilendirýge qatysty qujat kúshine ense, eldegi jeńil jáne orta deńgeıdegi qylmys jasaǵany úshin sottalǵandar sanyn 8 myńǵa qysqarady.
Bul týraly búgin Astanada ótip jatqan «Quqyq qorǵaý organdaryn reformalaý kezinde qylmystyq - atqarý júıesiniń qyzmetin jetildirý» atty dóńgelek ústel otyrysynda Prezıdent ákimshiliginiń Quqyq qorǵaý júıesi bóliminiń meńgerýshisi Alık Shpekbaev málim etti.
Onyń sózine qaraǵanda, atalmysh qujat sanktsııalardy jeńildetý, sotqa deıin tutqynǵa alýǵa negiz bolatyn sharttardy qysqartý sııaqty máselelerdi qarastyrady. Qoryta kelgende, ol qylmystyq jaza qurylymynda bas bostandyǵynan aıyrý jaǵdaılarynyń úles salmaǵyn keńeıtýdi kózdeıdi. «Eger zań kúshine ense, jeńil jáne orta deńgeıli qylmys jasaǵandary úshin sottalǵandar sanyn 8 myńǵa qysqartýǵa múmkindik beredi. Bul elimizdegi barlyq sottalǵandardyń 18 paıyzy. Olardyń qataryna osy zań qabyldanǵanǵa deıin sottalǵan jáne sottalǵaly turǵan azamattardy da kirgizýge bolady», - dedi Prezıdent Ákimshiliginiń ókili.
Onyń pikirinshe, qylmystyq-atqarý júıesin jańǵyrtýdyń basym baǵyttary qaýipti qylmyskerlerdi qoǵamnan oqshaýlaý, bas bostandyǵynan aıyrý oryndary boıynsha belgilengen tártipti saqtaý, halyqaralyq normalarǵa saı qyzmet etý, aqparatqa qoljetimdilik sııaqty ózge de birqatar talaptar bolyp qalýy kerektigin atap kórsetti.
«Árıne, bul baǵyttaǵy sharalar bizde qazirdiń ózinde oryndalýda. Degenmen, áli de bolsa jetildire túsýdi qajet etetin máseleler bar», - dedi A.Shpekbaev.
