Qylmystyq zańdardy izgilendirý saıasaty Qylmystyq ister júrgizý kodeksiniń eń bir durys úlgisin jasamaı iske asýy múmkin emes - Q. Mámı
ALMATY. 18 naýryz. QazAqparat /Erlik Erjanuly/ - "Biz QR Qylmystyq ister kodeksiniń eń bir úılesimdi úlgisin izdestirý ústindemiz".
Bul týraly QR Bas prokýrory Qaırat Mámı búgin Almatyda ótip jatqan "Adam quqyǵyn qorǵaýdy qylmystyq-protsessýaldyq salada qamtamasyz etýdegi kepildikter" dep atalatyn dóńgelek ústel májilisinde aıtty.
"Qylmystyq zańdardy izgilendirý saıasaty Qylmystyq ister júrgizý kodeksiniń eń bir durys modelin jasamaı iske asýy múmkin emes. QR Bas Prokýratýrasy tarapynan búgingi konferentsııada qylmystyq ister júrgizýdiń aldyńǵy kezeńderin barynsha izgilendirý máselesin kótereıik dep otyrmyz. Búgingi tańda barlyq batys elderinde kez-kelgen azamat quqyq qorǵaý organdaryna aryz jazǵannan bastap qylmystyq is júrgiziledi", - deıdi Qaırat Ábdirazaquly.
Bas prokýrordyń aıtýynsha, Qazaqstanda aryz qabyldanǵanan keıin bir aıǵa deıin onda qylmystyq belgisi bar-joqtyǵy tekseriledi. Tek sodan keıin baryp qana qylmystyq izdestirý jumysy bastalady. Tekserý jumysy keıde 2 aıǵa deıin sozylyp ketetin jaǵdaılar da bolady. Q. Mámıdiń sózine qaraǵanda, osy ýaqyttyń ishinde azamattardyń quqyqtary buzylyp, keıbir qylmysty anyqtaý múmkin bolmaı qalady. Sondyqtan osy kezeńnen biz barynsha bas tartýymyz kerek.
