Qylmystyq toptyń serkesi «jastardy tárbıeleý» jeleýimen «qoǵamdyq qor» qurǵan
Málim etilgendeı, qylmystyq top músheleri Tarazda ustaldy. Operatsııaǵa Іshki ister mınıstrligi Uıymdasqan qylmysqa qarsy kúres departamenti, Jambyl oblysynyń Polıtsııa departamenti jáne Ulttyq qaýipsizdik komıtetiniń qyzmetkerleri prokýratýranyń úılestirýimen uzaq daıyndalyp, jedel-tergeý is-sharalarynyń keshenin ótkizgen.
Vedomstvonyń jedel qyzmetkerleriniń nazaryna bopsalaýdyń birneshe faktisine, qylmystyq teketiresterge, qala men oblys aýmaǵyndaǵy kásipkerlerden qaryzdardy qaıtarýǵa qatysqan bir top adam túsken.
«Qylmystyq toptyń jetekshisi sońǵy kezderi ózin qoǵam belsendisi retinde kórsetip, jastardy tárbıeleý jónindegi patrıottyq qozǵalystyń atyn jamylyp, «qaıyrymdylyq qoǵamdyq qoryn» qurǵan.
Ol qylmys áleminiń serkesi ımıdjinen alshaqtap, «ádilettilikti jaqtaýshy» bloger retinde áleýmettik jelilerde belsendi bola bastaǵan. Qalada kúzet mashınalarynyń ilesip júrýimen ǵana qozǵalǵan», - delingen ІІM habarlamasynda.
Qylmystyq top basshysy óziniń qoryna jarnany kásipkerlerden alyp otyrǵan. Erikti túrdegi jarna delingenimen, kásipkerlerden aqsha bopsalaý boıynsha qylmystyq shema jasalǵan, ornyna «qylmys áleminen qamqorlyq» ýáde etken. Jarna tóleýge kelispegen bıznes ókilderine qorqytý, zorlyq áreketteri qoldanylǵan.
«Polıtsııaǵa toptyń 9 múshesi jetkizildi, 20-dan astam tintý júrgizilip, «qańtar» oqıǵasy kezinde oblystyq Polıtsııa departamentinen urlanǵan «Kalashnıkov» avtomaty, eki «Makarov» tapanshasy, myltyq, travmatıkalyq tapansha men basqa da sýyq qarý tárkilendi.
Sonymen qatar qylmystyq toptan eki keliden astam esirtki alyndy.
Qylmystyq topqa qatysýshylarǵa qatysty bopsalaý, qarý men esirtkini zańsyz saqtaý boıynsha 12 qylmystyq is qozǵaldy.
Kúdiktiler ýaqytsha ustaý ızolıatoryna qamaldy. Tergeý jalǵasýda», – dedi QR ІІM uıymdasqan qylmysqa qarsy kúres departamentiniń basqarma bastyǵy Qýandyq Alpys.