Qylmystyq topty basqarǵan erli-zaıypty Hrapýnovtarǵa halyqaralyq izdeý jarııalandy - Qarjy polıtsııasy
ASTANA. 1 qazan. QazAqparat - QR Ekonomıkalyq qylmysqa jáne sybaılas jemqorlyqqa qarsy kúres agenttigi Almaty qalasynyń burynǵy ákimi V.Hrapýnovqa,
onyń jubaıy L.Hrapýnovaǵa jáne ózge tulǵalarǵa qatysty bıýdjet qarajatyn urlaý, laýazymdyq ókilettikterin teris paıdalaný, para alý jáne zańsyz jolmen alynǵan qarajatty nemese ózge de múlikti zańdastyrý faktileri boıynsha qylmystyq isterdi tergeýde. Bul týraly Qarjy polıtsııasynyń baspasóz qyzmetinen málim etti.
Oǵan qosa tergeýmen 1997 men 2007 jyldar aralyǵynda Hrapýnov Almaty qalasynyń jáne Shyǵys-Qazaqstan oblysynyń ákimi bolǵan kezde óziniń jubaıy Hrapýnovamen birge qozǵalmaıtyn múlik obektilerin memlekettik menshikten zańsyz alyp, ony zańdastyrý, satý jáne alynǵan aqshalaı qarajatty Qazaqstan Respýblıkasynan tysqary shyǵarýmen aınalysqan uıymdasqan qylmystyq top quryp, onyń qyzmetin basqarǵandyǵy anyqtaldy.
Negizinen qylmystyq top memleket menshiginen qyzyl syzyqqa engizilgen jáne jalpy paıdalanýǵa arnalǵan, sýqorǵaý jáne tabıǵat qorǵaý aımaqtary men qoryqtarda ornalasqan, oǵan qosa tarıhı-mádenı mura bolyp tabylatyn obektiler men jerlerdi zańsyz alyp otyrǵan.
Qylmystyq jolmen tabylǵan múlikti satýdan alynǵan aqshalaı qarajat Hrapýnovtar otbasyna senimdi adamdardyń esep-shottary arqyly Shveıtsarııa Konfederatsııasyna jáne ózge shet elderge shyǵarylyp otyrǵan.
Búgingi kúni Vıktor Hrapýnov pen Leıla Hrapýnovaǵa qatysty sotpen olardy qamaýǵa alý týraly bultartpaý sharasy sanktsııalandy.
Olar halyqaralyq izdeýge jarııalandy.
Tergeý nátıjeleri jurtshylyqqa jetkiziletin bolady.
