Qylmystyq top qymbat kólikterdi jalǵa alyp, lombardqa ótkizip kelgen
Qaladaǵy lombardtardyń birinde jumys istegen qylmystyq top basshysy óz tájirıbesine súıenip, qomaqty aqsha tabýdyń jolyn oılap tapqan. Sodan qasyna 8 tanysyn tartqan.
Qylmystyq toptyń ár múshesi ózderine júktelgen mindetti múdirmeı oryndap otyrǵan. Biri jalǵa qymbat kólikter tabýmen aınalyssa, ekinshisi olarǵa jalǵan qujat jasaǵan. Keıin mashınalardy avtolombardtarǵa ótkizgen.
Osylaısha kúdiktiler keste boıynsha áreket etip, bir jyl ishinde «Lexus LX 570», «Toyota Land Cruiser 200» sııaqty qymbat 5 sheteldik kólikti lombardtarǵa qaldyryp, qarjy alǵan.
Biraz ýaqyttan keıin qaryz alýshylarmen baılanysqa shyǵa almaǵan lombard qyzmetkerleri alaıaqtyq týraly polıtsııaǵa habarlaǵan.
Jábirlenýshilerge keltirilgen zalaldyń jalpy somasy shamamen 40 mln teńgeni quraıdy.
Tártip saqshylary qylmystyq is boıynsha 9 kúdiktini qolǵa túsirdi.
«Qylmystyq is birneshe bap boıynsha tirkeldi: QR QK-niń 262-babymen «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý», QR QK-niń 190-babymen «Alaıaqtyq», QR QK-niń 385-babymen «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý», QR QK-niń 386-babymen «Kólik quralynyń sáıkestendirý nómirin qoldan jasaý, joıý, kórineý qoldan jasalǵan sáıkestendirý nómiri bar kólik quralyn ótkizý».
Qazirgi ýaqytta uıymdasqan qylmystyq toptyń barlyq múshesi, ıaǵnı 9 adam qamaýda. Qylmystyq is aıyptaý aktisimen sotqa joldandy», - delingen Shymkent qalasy polıtsııa departamentiniń baspasóz qyzmeti taratqan habarlamada.
