Qylmystyq top elimizdiń tórt qalasyna poıyzben esirtki tasymaldaǵan
NUR-SULTAN. QazAqparat - Kólik polıtseıleri esirtkini poıyzben tasymaldaýmen aınalysatyn bir top adamdy ustady, dep habarlaıdy QazAqparat kóliktegi polıtsııa departamentiniń baspasóz qyzmetine silteme jasap.
«Aqpan aıynda kólik polıtseıleri arnaıy is-shara kezinde Nur-Sultan, Pavlodar, Semeı jáne Ekibastuz qalalarynyń aýmaǵynda esirtki taratý maqsatynda poıyzben tasymaldap júrgen bir top adamdy anyqtap, ustady», - dep habarlady kóliktegi polıtsııa departamentiniń bastyǵy Ońal Bekıev.
Onyń aıtýynsha, top psıhotroptyq zattardy áleýmettik jelilerde kesh-betbelgi arqyly satý úshin «FaskGood» dep atalatyn ınternet-dúken ashqan.
Tintý barysynda 2 myńnan astam doza psıhotroptyq zattar, sondaı-aq olardy ólshep-oraýǵa arnalǵan qurylǵylar tárkilendi.
«Atalǵan fakti boıynsha sotqa deıingi tergeý amaldary júrgizilýde», - deıdi polıtsııa polkovnıgi.
Qazaqstan Respýblıkasy Qylmystyq is júrgizý kodeksiniń 201-babyna sáıkes ózge aqparat jarııalaýǵa jatpaıdy.
