Qylmystyq top eki óńirde asyl tastardy zańsyz óndirip, satyp kelgen

QARAǴANDY. QazAqparat - Qaraǵandy oblysynda asyl tastardy zańsyz óndirýmen jáne satýmen aınalysqan uıymdasqan qylmystyq top ustaldy, dep habarlaıdy QazAqparat Polisia.kz saıtyna silteme jasap.

«Júrgizilgen arnaıy operatsııanyń nátıjesinde Polıtsııa departamenti Uıymdasqan qylmysqa qarsy kúres basqarmasy Ulttyq qaýipsizdik komıtetiniń Qaraǵandy oblysy boıynsha departamentimen jáne «Arlan» arnaıy maqsattaǵy bólinisimen birlesip, asyl tastardy óndirýmen jáne ótkizýmen aınalysqan qylmystyq topty ustady», - delingen polıtsııa málimetinde.

Kúdikti retinde Qaraǵandy qalasynyń jáne Pavlodar oblysynyń tórt turǵyny ustalǵan. Olar asyl tastardy (ametıst, múkti aqyq, zaýza aqyq, kógildir aqyq, varetsıt) zańsyz satyp alý boıynsha mámile jasaý kezinde Qaraǵandydaǵy keńsede qolǵa tústi.

Fıgýranttar asyl tastardyń bir kelisin 500 AQSh dollaryna baǵalaǵan.

«Pavlodar oblysynyń 2 turǵyny asyl tastardy Qaraǵandy qalasynyń 2 turǵynyna berý ústinde ustaldy.

Tastar zańsyz jolmen Pavlodar jáne Qaraǵandy oblystarynyń aýmaǵynda dalalyq jerde óndirilgeni anyqtaldy. Qylmystyq kodekstiń 334-baby 3-bóligi boıynsha («Qylmystyq top bolyp jer qoınaýyn óz betinshe paıdalaný») tirkeldi. Bul bap 5 jylǵa deıin bas bostandyǵynan aıyrý jazasyn kózdeıdi.

Keńsede jáne ustalǵandardyń turǵylyqty jerinde tintý júrgizý kezinde jarty tonnadan astam (550 kg) asyl tastar, 27 myń AQSh dollary, 3,5 mln astam reseı rýbli, 600 myń teńge, sondaı-aq tastardy óńdeýge arnalǵan jabdyq jáne atys qarýynyń oq-dárileri alyndy», - delingen polıtsııa habarlamasynda.

Sondaı-aq málimetke sáıkes, polıtseıler Qaraǵandy qalasynan 130 km qashyqtyqta dalada ıesiz karerdi anyqtady. Onyń aýmaǵynda ustalǵan kúdiktilerdiń úsh kómekshisi anyqtaldy jáne taǵy 38 kg túrli asyl tastar alyndy. Qylmystyq is boıynsha qajetti saraptamalar taǵaıyndaldy, sotqa deıingi tergep-tekserý júrgizilip jatyr.

Foto:polisia.kz