Qylmystyq top belsendisi: Qyzylordada kólik órtengenderge qatysty jańa málimet
Budan buryn belgisiz bireýler turǵyn úı janynda turǵan kólikti órtep jibergenin jazǵan edik.
Oblystyq Polıtsııa departamenti oqıǵa jaıynda túsinik berdi.
Vedomstvo málimetinshe, 21 qarashada Qyzylorda qalalyq Polıtsııa basqarmasynyń kezekshi bólimine jergilikti turǵyn aryzdandy.
Belgili bolǵandaı, keshki ýaqytta qala ortalyǵyndaǵy kóshelerdiń birinde turǵyndy uryp-soǵyp, onyń «Opel Vectra» markaly avtokóligin belgisiz adamdar urlap ketken. Ony keıinnen órtep jibergen. Keltirilgen materıaldyq shyǵyn - 1 500 000 teńge. Kóp uzamaı Qyzylorda qalalyq Polıtsııa basqarmasynyń qyzmetkerleri eki kúdiktini ustady. Oqıǵanyń mán-jaıy anyqtalýda.
«Kúdiktilerdiń biri uıymdasqan qylmystyq toptyń belsendisi ekendigi anyqtaldy. Ol buryn qylmystyq jaýapkershilikke tartylyp, birneshe qylmysy úshin sotty bolǵan. 2015 jyly QR Qylmystyq kodeksiniń 296-babynyń 4-bóligimen 6 jylǵa sottalǵan. Qazirgi tańda kúdiktilerdiń ústinen QR Qylmystyq kodeksiniń 200-baby 2-bóliginiń 1,3-tarmaqtarymen jáne 202-baby 2-bóliginiń 1-tarmaǵymen sotqa deıingi tergep-tekserý amaldary bastaldy. Eki kúdikti qazirgi tańda basqarmanyń ýaqytsha ustaý ızolıatoryna qamaýǵa alyndy», - dep málim etti Qyzylorda oblystyq Polıtsııa departamentinen.
