Qylmystyq top Bahreınge kámeletke tolmaǵan qyzdardy da jiberip otyrǵan - ІІM

NUR-SULTAN. QazAqparat - QR Іshki ister mınıstrligi tergeý departamentiniń bastyǵy Sanjar Ádilovtiń aıtýynsha, bıylǵy 9 aıda adam saýdasyna qatysy bar 78 is sotqa joldanǵan, dep habarlaıdy QazAqparat tilshisi.

«Bıylǵy 9 aıda ishki adam saýdasyna qatysty 200 qylmystyq is boldy. Onyń ishinde 78-i sotqa joldandy. Qalǵandary boıynsha tergeý jalǵasyp jatyr. 26 adamǵa qatysty ártúrli jazany taǵaıyndaı otyryp, aıyptaý úkimi shyǵaryldy», - degen tergeý departamentiniń bastyǵy sońǵy úsh jylda jyl saıyn adam saýdasynyń 90 qurbany anyqtalǵanyn atady.

«Onyń 20-sy májbúrli eńbekke tartylǵan», - dedi ol ortalyq kommýnıkatsııalar qyzmetinde ótken brıfıngide.

ІІM ókiliniń sózine qaraǵanda, «adam eksporty» Azııadaǵy 6 elge baǵyttalyp otyrǵan.

«Bul rette Katar, Indonezııa, Bahreın, Birikken Arab Ámirlikteri, Túrkııa jáne Ońtústik Koreıada paıdalaný maqsatyn kózdeıtin segiz arna, sondaı-aq Ózbekstan men Qyrǵyzstannan adam ákeletin eki ımport dálizi joıyldy. Mysaly, bıyl biz Qazaqstan Respýblıkasynyń, Reseı Federatsııasynyń jáne Bahreın Koroldiginiń azamattarynan quralǵan 19 adamdyq transulttyq uıymdasqan topqa qatysty tergeýdi aıaqtadyq. Bahreınge jynystyq qanaý úshin tartylǵandardyń arasynda kámeletke tolmaǵandar da bar. Zardap shekkenderdiń jalpy sany 39-ǵa jetti. Qazirgi ýaqytta qylmystyq is sotta qaralyp jatyr», - dedi Sanjar Ádilov.