Qylmystyq tabystardyń izin jasyrýdyń aýqymy aıtarlyqtaı joǵary bolyp otyr
ASTANA. 22 qarasha. QazAqparat - Búgin Astanada QR Bas prokýratýrasy ınstıtýtynyń uıymdastyrýymen «Zańsyz jolmen tabylǵan qarajatty zańsyzdandyrýǵa qarsy kúres máseleleri» taqyrybynda semınap ótip jatyr.
Oǵan Bas prokýratýranyń qyzmetkerleri, Astanadaǵy EQYU ortalyǵynyń, Qazaqstandaǵy AQSh elshiliginiń ókilderi, sondaı-aq halyqaralyq sarapshylar qatysýda.
«Qazaqstanda jemqorlyqpen kúres boıynsha aýqymdy jumystar júrgizilýde. Bul óz kezeginde zańsyz jolmen tabylǵan qarajatty zańdastyrýǵa tosqaýyl qoıýdyń bir elementi bolyp tabylady. Ekinshiden, qarsy kúres sharalary esirtki bıznesiniń jolyn kesýge baılanysty»,-dedi QR Bas prokýratýrasy ınstıtýty dırektorynyń orynbasary Shákir Shaıahmetov. Osy oraıda ol esirtki saýdasynan túsken qarajat ta lańkestik uıymdardy qarjylandyrýǵa baǵyttalyp jatatynyn tilge tıek etti.
Atap aıtqanda, respýblıkada eki jyldan astam ýaqyttan beri qarjylyq monıtorıng komıteti jumys istep jatyr. Onyń jumysy kúdikti qarjylyq operatsııalardy baqylaýǵa negizdelgen
Belgili bolǵandaı, eki jyldyń ishinde qylmystyq qýdalaý organdary zańsyz jolmen tapqan qarjy men basqa da múlikti zańdastyrýǵa baılanysty 250-ge jýyq qylmysty anyqtady. Alaıda , atalǵan qylmystyq tabystardyń izin jasyrýdyń naqty aýqymy aıtarlyqtaı joǵary kórinedi.
