«Qylmystyq protsesti ońtaılandyrý» jobasy aıasynda isterdi tergeý merzimi qysqardy
«Sońǵy ýaqytta Bas prokýratýra tarapynan azamattardyń quqyn qorǵaý, qoǵamdy ilgeriletý boıynsha usynystar men bastamalar kóbeıip keledi. Ókinishke oraı, xalyqqa aqparat tolyq jetpeıdi. Jetse de mańyzy men máni kórsetilmeıtin tustar bar. Osyǵan oraı, men ózimniń jeke paraqshamda azdap aqparat berip otyrýdy uıǵardym»,- dep jazdy ol.
Osy rette Nurdildá Oraz «Qylmystyq protsesti ońtaılandyrý» ilki jobasyn jan-jaqty túsindirip berýge tyrysqan.
«Bul joba Bas prokýratýra jáne ІІM-men birge 1 aı buryn qolǵa alyndy. Ázirge Astana men Aqmola oblysynyń aýdandyq ishki ister bólimderinde iske asyp jatyr. Basty maqsat - sotqa deıingi aıqyn, kúmánsiz qylmystyq isterdi qaraý merzimin qysqartý. Qarapaıym tilmen túsindirýge tyrysaıyn. Búgingi tańda qylmystyq teris qylyqtardy tergeýge jáne sot sheshimin shyǵarýǵa 19 kún, jalpy qylmystar boıynsha 2,5 aı ýaqyt ketedi. Tipti esh kúmánsiz, aıǵaqtar bar, kýáler kórsetip, kúdikti kinásin moıyndap tursa da osyndaı ýaqyt alady. Mundaı jaǵdaıda qylmystyq protseske tartylǵandar - saǵattap suraq-jaýap berýge, sabylyp dálizde turýǵa májbúr. Onyń ústine tergeýshiler ózderin «sol taǵdyrlardyń qojaıyny» sııaqty sezinedi. Zań boıynsha ýaqyty asyp-artylatynyn túsinip, isti saǵyzsha soza bastaıdy. Azamattardy áýre-sarsańǵa salady», - dedi apparat basshysynyń orynbasary.
Ol joba aıasynda naqty qandaı sharalar júzege asyrylǵandyǵyna da keńinen toqtalyp ótken.
«Tergeý protsesinde túkke qajeti joq bıýrokratııalyq dúnıelerdi ysyrdyq. Tergeýdiń sapasyna zalal keltirmeıtin, kerisinshe protsesti baıaýlatatyn mexanızmder alynyp tastaldy. Kezekshi prokýrorlardyń jumysy qaıta qaraldy. Olardy sol AІІB-ǵa otyrǵyzdyq. Sol jerden isti qarap, tez arada sotqa joldaýǵa múmkindik ashyldy. Buryn ondaı ister prokýratýra qabyrǵasynda 10 kúnge deıin jatatyn. Azamattardyń jeke qaýipsizdigi suraq-jaýap alý úshin shynydan jasalǵan kabınetter ashyldy. Protsestiń bári alaqandaǵydaı kórinip turady. Olardyń bárine beınekameralar ornatyldy. Endi alǵashqy nátıjelerdi aıtaıyq. Joba bastalǵaly 3 aptanyń ishinde isterdiń 70 paıyzy 3 táýlikke deıin tergelip bitken. Qalǵany ári ketkende 1 apta ýaqyt alǵan. Sotta qaralatyn merzim de edáýir qysqardy. 6-10 táýlik. Taǵy bir atap ótetin jaıt, isti tergeıtin polıtseılerdiń jumysyna aryz-shaǵymdar 2 esege deıin azaıǵan»,- dedi Nurdildá Oraz.
