Qylmystyq-protsessýaldyq kodekstiń jańa jobasy ázirlenedi
ASTANA. 10 mamyr. QazAqparat /Qanat Mámetqazyuly/ - Qylmystyq-protsessýaldyq kodekstiń jańa jobasy ázirlenetin bolady. Bul týraly búgin QR Parlamenti Májilisi Zańnama jáne sot-quqyqtyq reforma komıtetiniń otyrysynda «Qazaqstan Respýblıkasynyń keıbir zańnamalyq aktilerine qylmystyq jáne qylmystyq is júrgizý zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda QR Bas prokýrorynyń orynbasary Iogan Merkel málim etti.
«Ótkende elimizdiń Quqyqtyq saıasat jónindegi keńesinde, sondaı-aq Qaýipsizdik keńesi men Úkimettiń otyrysynda Qazaqstannyń Qylmystyq- protsessýaldyq zańnamasyn jalpylama túrde odan ári jetildirý máselesi kóterilgen bolatyn. Osyǵan oraı, biz jańa Qylmystyq-protsessýaldyq kodeks jobasyn ázirleıtin bolamyz. Búgingi kúni osy baǵytta jetkilikti túrde ońtaıly halyqaralyq tájirıbe qalyptasyp otyr. Onyń ishinde AQSh tájirıbesi de jete zerdelendi. Máselen, ol eldegi barlyq qylmystyq isterdiń 90 paıyzy kináni moıyndaý boıynsha kelisimsharttar jasasý tájirıbesimen júzege asady. Budan bólek, bizdiń mamandar Grýzııada da bolyp qaıtty. Bul elde de jańaǵy tájirıbeni paıdalaný 80 paıyzǵa deıin jetedi. Osyndaı tájirıbe arqyly tergeýaldy tekserý júrgizý organdary úlken aýyrtpashylyqtan qutylatyny da boljanady», - dedi QR Bas prokýrorynyń orynbasary Iogan Merkel. Onyń aıtýynsha, jańa jobamen aǵymdaǵy jyldyń qyrkúıegine deıin arnaıy qurylǵan jumys toby jumys isteıtin bolady. Buǵan elimizdiń belgili zańger ǵalymdary da tartylmaqshy. Al aldaǵy ýaqytta Qylmystyq-protsessýaldyq kodekstiń jańa jobasyn ázirleýge baǵyttalǵan halyqaralyq ǵylymı-tájirıbelik konferentsııalar uıymdastyrylmaq.
Esterińizge sala keteıik, Májilis komıteti talqylaǵan zań jobasy Qylmystyq kodekstiń naqty baptarynyń sanktsııalaryndaǵy kópnusqalyqty qysqartýǵa, qylmystyq qýdalaý organdarynyń sotqa deıingi qyzmetiniń is júrgizý nysandarynyń biri retinde tergeýaldy tekserý júrgizý tártibin retteýge ári qylmystyq jáne qylmystyq is júrgizý zańnamasyn jetildirýge baǵyttalǵan.
