Qylmystyq protseske «kinásin moıyndaý týraly mámile» ınstıtýty engiziledi
ASTANA. QazAqparat - Qazaqstandaǵy qylmystyq is júrgizý protsesine «kinásin moıyndaý týraly mámile» ınstıtýty engiziledi. Bul týraly búgin QR Parlamenti Májilisiniń jalpy otyrysynda málim boldy. Jalpy otyrysta QR Qylmystyq is júrgizý kodeksiniń jobasy birinshi oqylymda maquldanǵan bolatyn.
Atalǵan kodeks jobasy sot tóreligin júrgizýdiń tıimdiligin arttyrý, adam men azamattyń konstıtýtsııalyq quqyqtaryn saqtaý jáne qorǵaý kepildigin kúsheıtý maqsatynda qylmystyq sot isin júrgizýdi jańǵyrtýǵa baǵyttalǵan. Bul maqsatta qylmystyq qýdalaýdy bastaý rásimin ońaılatý kózdeledi. Sonymen qatar, tergeý men anyqtaý organdarynyń azamattar quqyqtaryn qozǵaıtyn áreketterdi derbes qabyldaý boıynsha ókilettikteri taryla túsedi. Al advokattar sotqa deıingi is júrgizýden bastap qatysýy keńeıtiledi. Budan bólek, qylmystyq protseske «kinásin moıyndaý týraly mámile» ınstıtýty engiziledi. Onyń negizgi mindeti kúdiktiniń jasaǵan áreketi úshin jazany jeńildetý maqsatynda tergeý organymen belsendi yntymaqtastyqqa qol jetkizý bolyp tabylady. Sonymen qatar, sot isin júrgizý de ońaılatylyp, jedeldetiledi, óıtkeni úlken kólemdi tergeý jáne sot áreketterin júrgizýdiń qajeti bolmaıdy. Sondaı-aq qylmystyq sot isin júrgizý sheńberinde jedel izdestirý sharalaryn júrgizý tártibi retteledi. Sonymen bir mezgilde mundaı áreketterge prokýrordyń sanktsııa berýi azamattardy olardyń jeke ómirine qolsuǵylmaýshylyq konstıtýtsııalyq quqyǵynyń buzylýynan qorǵaýǵa múmkindik beredi. Taǵy bir jańalyq sottyń sotqa deıingi is júrgizýdi baqylaýyn keńeıtý maqsatynda qylmystyq protseske tergeý sýdıasy ınstıtýty engiziletin bolady. Onyń ókilettigine jekelegen tergeý áreketterine sanktsııa berýden basqa, sotqa deıingi is júrgizý satysynda taraptardyń shaǵymdary men ótinishhattaryn qaraýdy engizý de usynylady. Jańa redaktsııadaǵy Qylmystyq kodeks jobasymen qylmystyq teris qylyqtardy tergeý máseleleri de retteledi.
